Îstanbul de bi beşdarîya Hemserekan ê Pêroyîyan ê HDPyî Pervîne Buldan û Mîthat Sancarî serrgêra 8. ya ronayîşê HDPyî bi şayîyêke Merkezê Nawnayîşî yê Bostanci de ameye fîrazkerdene. Parlamenter, îdarekarê HDPyî, temsîlkarê rêxistinanê komelê sivîlî û bi hezaran hemwelatîyî beşdarê şayîye bîyî. Salona şayîye bi alayanê HDPyî û pankartanê bi kurdkî û tirkî ameye xemilnayene. Hemwelatîyan sloganî vatî û paştdayîşê xo mojna HDPyî.

Qiseykerdişanê destpêkî ra dima seba kesanê ke têkoşînê azadî û demokrasî de merdî, deqayêk rêz ame girewtene. Dima bi sînevîzyonêk qala têkoşînê HDPyî ameye kerdene.

Merasîmê şayîye de sere de ê Selahattîn Demîrtaş û Fîgene Yuksekdag mesajê xeylêk kesan ameyî wendene. Serekê Pêroyî yê CHPyî Kemal Kiliçdarogluyî û Şaredarê Îstanbulî Ekrem Îmamogluyî zî bi mesajêkî serrgêra ronayîşê HDPyî fîraz kerde.

Merasîm de Hemvervatoxa HDKyî Îdîle Ugurlu qisey kerd û qala têkoşînî kerde û îfade kerd ke ê do rayraşîyayîşê xo dewam bikerê.

Selamkerdişî ra dima Hemserekanê Pêroyîyan Pervîne Buldan û Mîthat Sancarî qisey kerd û mesajê girîngî dayî.

Pervîne Buldan ard ziwan ke heta ke hêvî estba HDP zî do estbo û têkoşînê înan do bêmabên dewam bikero.

Mîthat Sancarî zî bale ante xoverdayîşê HDPyî ser û vat: ''Nameyo bîn ê xoverdayîşî HDP yo. Ma sey HDP 8 serre yê labelê peyê ma de se serrî estê. HDP 8 serre nê 8 hezar serre yo.''