HDP: Tezkereyê şerî do AKP-MHPyî rê fayde bikero

Vervatoxa HDPyî Ebru Gunay derheqê tezkereyê teberê sînorî de venga muxalefetî da û vat: ''Tezkereyê şerî do îqtîdarî rê fayde bikero.''

Vervatoxa HDPyî Ebru Gunay merkezê HDPyî de kombîyayîşê çapemenîye de rojdem ercna. Gunaye verî qurbanê erzlerzê Wanî yê 2011î yad kerdî.

Qiseykerdişê Gunaye ra beşêk wina yo:

''Cezaya ke dîyay Ayşe Gokkan  polîtîkaya îqtîdarî ya vera cinîyan eşkera kena. Ayşe Gokkan hertim vera ferasetê tekperestî, serwerî û camêrdan têkoşîn kerd.

Merdimê Qesre welatî cumê awe kenê la ê bi xo dans kenê. Ê serwetê xo şawenê welatanê teberî û bi luksî ciwîyenê. Ma vanê budçe ra parêk wa bêro dayene bêkar, cinî û ciwanan la Meclîs qala şerî keno. Îqtîdarê AKP-MHPyî pê tezkereyanê şerî wazeno emrê xo derg bikero la o do nêeşko xo bixelisno.

Ma venga muxalafetî û şarî danê ke tezkereyê şerî do têna îqtîdarî rê fayde bikero. Îqtîdar teng bîyo û hînî tira tena vengê şerî vejîyeno. Ê serê erdê welatan ê bînan de xeyalanê şer û wijîyayîşî kenê Serekê AKPyî Erdogan qala hêrişê vera Rojawanî keno. Erdogan zî baş zaneno ke eke şerêk nêvirazo û krîz xurtêr nêkero do nêeşko îqtîdar de bimano.

Nê prosesî de ke çareserîya meseleya kurdan yena nîqaşkerdene tewirê muxalefetî yê vera waştişê şerî yê îqtîdarî zaf girîng o. Eke ê sey verî paştî bidê îqtîdarî nîqaşê edalet, azadî û demokrasî yê Tirkîya do vinderê. La eke muxalefet û komel vera nê waştişî tewirê xo bimojnê o çax do ser bikewê.''