Denîz Buyukçelebî mîyanê rêxistinbîyayîşê DAÎŞî yê Tirkîya de ca gêno ke hetê MÎTî ra ame awankerdene û plansazkeranê hêrişanê vera HDPyî ra yew o. Eşkera bi ke cinîya ey Şengul Buyukçelebî zî endama Baskê Cinîyan ê AKPyî ya.
Şengul Buyukelçî ya ke hêrişkaranê zaf qirkerdişanê Tirkîya û Kurdîstanî ra ya û wextêkê dergî Sûrîye de mende eşkera bîye ke endama Baskê Cinîyan ê AKPyî ya. Buyukçelebî hema zî endamêka aktîfe ya AKPyî ya.
Şengul Buyukelçî camêrdê xo Denîz Buyukçelebî redye serra 2014î de şîye Sûrîye û dima ke DAÎŞ erdî ser o ame çinkerdene agêraye Tirkîya. Buyukçelebîya ke bi rayîrê îlegalî agêraye, 1ê hezîranê 2018î de şîye Mudirîyetê Asayîşî yê Nîzîpî û îfade da ke a wazena 'poşmanîye' ra fayde bigêra.
Îfadeyê Buyukçelebî resa ANFyî. Îfadeyê xo de Buyukçelebî derheqê rêxistine de zanayîşan dana û detayanê girîngan eşkera kena. Buyukçelebî îfadeyê xo de vana ke a endama Baskê Cinîyan ê AKPyî ya, verî ke tewrê DAÎŞî biba şîbî Komeleya Ciwanan a Misilmanan ke Dîlok de awan bîye û walîtîye zî destûrê ci da. Dima ke perwerdeyo dînî dî camêrdê xo reyde şîye Sûrîye.
Buyukçelebî pare kerd ke verî ke şîyî Sûrîye endamê rêxistine yê welatanê xerîban ameyêne keyeyê ci û wextêkî ra dima bi rayîrê camêrdê xo derbazê Sûrîye bîyî.
Buyukçelebî ard ziwan ke înan Îlhamî Bali, Nûsret Yilmaz, Yunus Durmaz û Ahmet Guneş verî ke derbazê Sûrîye bîyî nas kerdî ke înan hêrişê DAÎŞî yê Tirkîya û Vakurê Kurdîstanî organîze kerdêne. Buyukçelebî da zanayene ke sere de derbazkerdişê sînoran zaf karanê cîyayan de rolêkê aktîfî kay kerd û camêrdê ci zî hetkarê Bali bi.
Buyukçelebî îfadegirewtişî ra dima seba tepiştişî sewqê mehekem bîye û seba ke tehqîqatî de vat a wazena 'poşmanîye' ra fayde bivîna, bi şertê kontrolê edlîyî ameye veradayene û bi hawayêkê nêtepişteyî ameye hukmkerdene. Peynîya hukmkerdişî de zî heman bahane ra bire ameye dayene ke hewce çin o ke bêra cezakerdene.
