Rojnameyê Ouest-France ca da hêrişanê îşxalî yê dewleta tirke yê vera Başûrê Kurdîstanî û sewqîyatê PDKyî û tedaya ci ya vera şarî. Xebere de ke hetê Sylvain Mercaiderî ra ameye kerdene, bale ameye antene ser ke sivîlê Başûrê Kurdîstanî bedelê nê 'şerê gemarinî' danê.

Suleymano ke hêrişan ra neçare mend o dewa xo ya Mêrgêreşê ya herêma Bradostê ya Sîdekanê biterikno nê çîyan ano ziwan: ''Hêrişê verênî yê fuze de adir kewt baxçeyê ma. Birazîyanê mi xîret kerd ke şewat hewna bikerê la hêrişê diyînî de hîrêminî zî birîndar bîyî. Lingê yewî tira bi. Her çi ma destî ra şi.''

Suleyman pare keno ke hêrişî bi giranî tesîrê înan kerd û ê do reyna nêeşkenê abigêrê dewa xo ke ameye vengkerdene.

Sey Suleyman bi hezaran kesî neçare mendî ke dewanê xo biteriknê.

Xebere de dîyeno zanayene ke Erdoganî vera PKKyî operasyonê xo kerdî zêdêr û teyarayê bêmerdiman hêrişê sivîlan kenê.

Birazîyê Suleymanî Xoşewî zî vano: ''Roja ke hêriş bi Mêrgêreş de qet yew şerwan/e çinbi/bî. PKK keyeyan ra dûr daristanan de maneno.''

Xoşewî birayê xo Muhacir û keyeyê xo reyde şaristanê Soranî de ca bîyî. Wird birayî zî hêriş de bîyî seqat û rewşe ser o qerqilîyenê. Birayî vanê: ''Ma nêeşkenê domananê xo bidê wendene. Hukmat hetkarîya ma nêkeno.''

Rojnameyî eşkera kerd ke artêşa tirke vera hêrişan kena û Biradost de zî şiwanêk birîndar bîyo. Rojnameyî vat ke leşkerê tirkî pez zî tede hêrişê pêro cayan û gandaran kenê.

Roniştoxanê Sidekanî ra Hama vana: ''Par keyeyê 20 koçeran bi hedefê hêrişê hewayî. Derheqê hêrişî de tehqîqat nêdîya destpêkerdene.

Goreyê rêxistina komelê sivîlî Christian Peacemaker Teamî serra 2015î ra nata tewr tay 97 kesî hêrişê dewleta tirke de merdî û 100 kesî zî birîndar bîyî. Goreyê doneyanê rêxistine 126 dewî ameyî vengkerdene û 500 dewî zî binê gefan de yê.

Rojname xebere de nê tesbîtî keno: ''Tirkîya nê şerê gemarinî de cîyakerîya mabênê kurdan ra bawer kena. Anqara pê PDK bawer a.''

Aktîvîstêkê ciwanî xebere de vat ke bi desan muxaîfê ke hemkarîya PDK-Tirkîya rexne kerde, ameyî tepiştene. Sîyasetmedarêkê kurdî zî pare kerd ke PDK xîret keno ke rayîrê PKKyî bibirno.