Hemserekanê Pêroyîyan ê HDPyî Pervîne Buldan û Mîthat Sancarî seba ke Rayberê Şarê Kurdî Abdullah Ocalanî de pêvînayîş bikerê muracatê Wezîrîya Edaletî kerd.

Vervatoxa HDPyî Ebru Gunay agahîya muracatî kombîyayîşê çapemenîye de pare kerde.

Ebru Gunay û Endamê Heyetê Rayberdişê Merkezî yê HDPyî û birazîyê Abdullah Ocalanî Omer Ocalan zî mîyanê heyetê muracatî de cagênê. Muracat de ame waştene ke Zîndanê Îmraliyî bêro zîyaretkerdene.

Gunaye venga Wezîrîya Edaletî da ke wa cewab bida muracatî.

Gunaye vat: ''Îqtîdarî pê girankerdişê sîstemê tecrîdî yê Îmraliyî dişmenîya vera kurdan û çaresernêkerdişê meseleya kurdan da destpêkerdene. Birêz Ocalanî seba çareserîya meseleya kurdan pêşnîyazî kerdî û xîret kerd. La nika no hêzê çareserîye yeno tecrîdkerdene. Îqtîdar seba ke sîstemê faşîzmî awan bikero û sîyasetê înkarî rê dewam bikero tecrîd ano ca. Hemserekanê ma Pervîne Buldan û Mîthat Sancarî, Wekîlê ma Omer Ocalan û ez zî tede ma şîyî Wezîrîya Edaletî û seba pêvînayîşê bi Îmraliyî muracat kerd. Ma venga Wezîrîye danê ke wa cewabê pozîtîfî bida muracatê ma.''