Platformê Dezgehanê Demokratîkan deklarasyonê mîtîngê 'Demokrasî û Azadîye' yê 17ê teşrîna peyêne eşkera kerd. Mîtîng Çarrayîrê Basinî de do bêro kerdene.

Eşkerakerdişê deklarasyonî ra dima Hemserekê KCDyî Berdan Ozturkî û Hemsereka DBPyî Çîgdem Kiliçgun Uçar venga pêro kesan da ke seba haştîyêka rûmetêne û azadîye tewrê mîtîngê 17ê teşrîna peyêne bibê.

Ozturkî vat: ''Îqtîdaro ke îradeyê kurdan qebul nêkeno û qeyûman tayîn keno kurdan rê gefan waneno. La kurdî qeyûman qebul nêkenê û xo ver danê. Seba awankerdişê haştîyêka rûmetêne û vera koletîye ma tewrê mîtîngê Êlihî bibê.''

Çîgdeme vat: ''Êlih merkezanê têkoşînê kurdan ra yew o ke hetê îqtîdarî ra pêşkêşê Hîzbullahî yeno kerdene. Pêşnîyazê çareserîye yê Birêz Ocalanî ganî hetê îqtîdaî ra bêrê dîyene. Îqtîdar keno ke bi şîdetî meseleyan çareser bikero. Vera ney ma bi serkêşîya felsefeya 'Jin, Jiyan, Azadî' tewrê mîtîngî bibê.''