Serekkomarê Tirkîya Erdoganî îlan kerd ke ê do binê sîwana Wezîrîya Kultur û Turîzmî de Serekîya Cemxaneyan û Kulturê Elewî-Bektaşîyan awan bikerê. Hemserekê Komeleya Elewîyan ê Demokratîkan (FEDA) Demîr Çelîkî bire ANFyî rê ercnaye.

Demîr Çelîkî ard ziwan ke seba ke elewîyî bawerîya înan ra dûrî bibê na game erzîyaye û bi nê hawayî bawerîya elewîtîye raştîya xo ra yena vetene, serê dînê dewlete 'îslamê muqtedîrî' yena kerdene. Çelîkî da zanayene ke dewlete bi awankerdişê Serekîya Cemxaneyan û Kulturê Elewî-Bektaşîyan şiroveyêkê Îslamî do elewîyan rê ferz bikera. 

Çelîkî vat: ''Bi rayîrê tay elewîyanê ke verê dewlete de çok şîyê erdî ro, do wina bêro mojnayene ke cewab dîyeno tay waştişanê normalan ê elewîyan. Dezgehê elewîyan ê ke çok nêşîyê erdî ro zî do bêrê terorîzekerdene. Elewîyan rê dînê dewlete, sûfîzm do bêrê ferzkerdene. Tay elewîyan na bire sey 'cemxaneyan rê tayînê qeyûman' pênase kerd la no pênase na rewşe rê nêvejîyeno. Na bire yena manaya mudaxeleyê dewleta nîjadperest înkar û tekpereste yo ke mîyanê bawerîya elewîyan de do biba sebebê qirkerdişê kulturel, bawerî û sîyasî.

Ma hê prosesêkê hesas û zehmetî de yê. Îqtîdar wazeno bi rayîrê Dîyanetî mudaxeleyê komelî bikero. Hişmendîya înkarî xîret kena ke Îslamê Kulturelî bivurna dînê dewlete û pêro komelî rê û bawerîyan rê nê dînî ferz bikera, elewîtîye sey mezhebêkî bida qebulkerdene. Erdogan û îqtîdarê AKPyî bi hesabê weçînayîşî na game erzenê. Dewlete rêxistinîya elewîyan ra aciz a û tersena ke têgêrayîşê elewîyan têgêrayîşê kurdan de têbigêra.''

Çelîkî pare kerd ke heta ke cewab nêro dayene waştişanê bingeyî û hemparan ê elewîyan meseleya elewîyan do çareser nêba û waştişê elewîyî wina rêz kerdî:

*Ganî bêro qebulkerdene ke bawerîya elewîyan bawerîyêka xoser a û na bawerî bi Qanûnê Bingeyî bêra pawitene.

*Ganî xîretê mudaxeleyê sîstemê Ocaxan vinderê, rêxistinîya Ocaxan bi Qanûnê Bingeyî bêro pawitene.

*Têkilîya Pîr-Talipî ganî nêra astengkerdene.

*Jîyargehî, dîyarî û pêro warê fîrazî wa bipawîyê.

*Îbadetxaneyê Cemxaneyan rê wa statu bêro dayene.

*Tedeyîya perwerdeyî de wa perwerdeyê bi ziwanê dayîke est bo û dersê dînî yê mecbûrî wa wedarîyê.

*Serekîya Karanê Dîyanetî wa bêra wedaritenee. Ganî dewlete bi hawayêkê têdûştî xo nêzdî pêro nasname, dîn û bawerîyan bikera.

*Qanûnê Bingeyî yê têdûşt, sivîl, laîk, adîl û demokratîkî de xoserîya nasname, ziwan û dînan wa bêra pawitene.