Seba ke Garê, binpaykerdişanê heqanê merdiman û tecrîdê Îmraliyî ser o eşkerayîyî dayî vera Hemserekê Pêroyî yê ÎHDyî Ozturk Turkdoganî bi îdîaya 'endamîya rêxistine' dewa ameye akerdene. Dima ke Serdozgerîya Komare ya Anqara Ozturk Turkdoganî ser o îdîaname amade kerd Mehkemeya Cezaya Girane ya Anqara dewa akerde.

Merkezê Pêroyî yê ÎHDyî de derheqê dewa de kombîyayîşê çapemenîye ame kerdene. 

Xeylêk pawitoxê heqanê merdiman tewrê kombîyayîşî bîyî. Verî Serekê Akademîya Heqanê Merdiman a ÎHDyî Husnu Ondulî qisey kerd û vat ke kerdişê îqtîdarî kerdişanê serranê 90an ra xirabêr ê. Ondulî da zanayene ke dewaya vera Turkdoganî 22ê sibate de do bêra kerden û venga her kesî da ke tewrê roniştişê dewa bibo. 

Ozturk Turkdoganî zî ard ziwan ke na dewa antî-demokratîk a û dewayê winasênê do nêeşkê ke têkoşînê ÎHDyî vindarnê.

Serekê verênî yê ÎHDyî Yusuf Alataşî pare kerd ke ê do vera dewayanê winasênan sereyê xo mearê war û binê pêro şertan de zî heqanê merdiman û fikranê xo bipawê.