Seba wedaritişê heqê destpanêdayîşî yê Hemsereka Pêroyî ya DBPyî Salîha Aydenîze Komîsyonê Amadekarî yê Komîsyonê Edaletî û Qanûnê Bingeyî yê Meclîsî kom bi. Kombîyayîşî qasê di saetan dewam kerd. Wekîlê HDPyî Abdullah Koç, wekîlê CHPyî rafet Zeybek, wekîlê AKPyî Emîne Zeybek û Orhan Kircali zî tewrê kombîyayîşî bîyî.

Wekîlê HDPyî Abdullah Koçî qasê saetêke pawitiş kerd û dîyar kerd ke tewirê vera Aydenîze sîyasî yo û warê huqûqî de ganî heqê ci yê destpanêdayîşî nêro wedaritene. Koçî vat: ''Ma reyna vînenê ke wexto ke HDP beno babete heqê destpanêdayîşî bi rehetî yeno wedaritene. Ma do têkoşînê xo rê dewam bikerê.''

Rafet Zeybekî nameyê CHPyî ser o raydayîş de raya ney daye. Komîsyon de seba wedaritişê heqê destpanêdayîşî 3 rayê 'heya', 2 rayê 'ney' dîyayî. Bi rayanê wekîlanê AKPyî seba wedaritişê heqê destpanêdayîşî yê Aydenîze raporêk ame amadekerdene.

Seba ke pawitişê xo bikerê heta 18ê temmuze wext dîya CHP û HDPyî.

Komîsyonê Amadekarî do raporî pêşkêşê Komîsyonê Karma bikero, no komîsyon zî do serê raporî nîqaşî bikero. Wextê nîqaşê raporî de Aydenîze yan zî wekîlêko/a bîn/e eşkeno/a pawitişî bikero/a. Eke Komîsyonê Karma de seba wedaritişê heqê destpanêdayîşî bire bêra girewtene proses do dewrê Heyetê Pêroyî bikero.