'Her keso ke îmkanê ci esto ganî tewrê na kampanya bibo'

Hemsereka HDPyî ya Îstanbulî Elîfe Bulut derheqê Kampanyaya Keyeyê Wayûbirayî ya HDPyî de qisey kerd û vat: ''Ma venga her keso ke îmkanê ci esto danê ke xo rê keyeyêk bivîno ke eşkeno ci rê hetkarîye bikero.''

HDPyî seba ke prosesê vîrusê Korona de paştdayîş xurt bikero dest pê Kampanyaya Wayeûbirayî kerd. HDP wazeno ke bi na kampanya paştdayîş û parekerdiş xurt bikero.

Hemsereka HDPyî ya Îstanbulî Elîfe Bulut derheqê kampanya de ANFyî reyde qisey kerd û bale ante girîngîya paştdayîşî ya prosesî ser û venga her kesî da ke tewrê kampanya bibo.

Bulute vat: ''No jan xo resneno her kesî la netîceya ci seba her kesî heman nêbena. Merdimê ke nêeşkenê debarê xo bikerê neçare manenê ke şorê teber bixebitê. Tay merdimî zî nêeşkenê şorê kar, karî ra ameyî vetene û ameyeyê înan çin o. Nê merdimî hewceyê hetkarîya ma yê. Ganî ma paştî bidê yewbînan. Coka Kampanyaya Wayûbirayî zaf girîng a.''

Bulute derheqê kampanya de nê zanayîşî zî dayî: ''Pê na kampanya ma pereyan cayêkî ra peyda nêkenê û nêerşawenê cayêkî. Na kampanya de merdimî bi xo hetkarîya xo resnenê. Ma venga her keso ke îmkanê ci esto danê ke xo rê keyeyêk bivîno ke eşkeno ci rê hetkarîye bikero.''