Hêrişê DAÎŞî yê vera cinîyan ê Şehba

Cinîyê Şehba seba ke DAÎŞ hêrişê înan nêkero gore qaîdeyanê DAÎŞî têgêrayî la reyna zî cerganê DAÎŞî hêrişê xo vera înan dewam kerd.

Cinîyanê Şehba behsê hêriş û tedaya cerganê DAÎŞî yê vera înan kerd. Ezîza Beşar a ke dewa Tirl Eranî ra ya behsê hêriş û tedaya DAÎŞî kerd û vat: "Wexto ke kewtî dewa ma vengê xo kesêkî ra nêkerdêne. La wexto ke dewe ra derbaz bîyî vatêne 'Ellah û Ekber'. Wexto ke venê wesayîtanê înan ameyêne domanî tersayêne û dekewtêne zereyî. Cergan dima ma rê vat 'Şima kurd ê, kafir ê'

Rojêke saete 3î de ma dî ke bi çekanê giranan hêrişê ma kenê.  DAÎŞî tay kesî kiştibî, cenazeyê înan verê camîyî de verdabî. Înan îşkence bi cenazeyan kerdibî. DAÎŞî goristanî de vindertêne. Nêverdenê ke kesêk zî cenazeya xo defn bikê. Cenazeyî binê daranê zeytunan de ameyî defnkerdene. Ez gêra ci la mi cenazeya lajê xo nêdî."

Cinîya bi nameyê Yesmîne Qelîşero vat: "Cergan îşkence bi her kesî kerdêne. Cayêk estbi nameyê ci kerdibi cayê mergî. Uca de şar kiştêne û sereyê înan cira kerdêne, verê çimanê dadîyêke de sereyê lajê ci tira kerd. Cergan bi zorî cinîyî remnayêne û ê bi endamanê xo de zewijnayêne. Eke bidîyêne kesêk cixare şimeno îşkenceyo giran kerdêne."