Paytextê Fransa Paris û bajaranê Hamburg û Duisburgî yê Almanya de hêrişê îşxalî yê dewleta tirke yê vera Rojawanî ameyî şermezarkerdene.

Paris de hetê CDK-F, TJK-F, TCŞ û Teko-JIN ra ra verê Sersefîrîya Rûsya de eşkerayîya çapemenîye amaye dayene û bêvengîya Rûsya ya vera hêrişan ameye şermezarkerdene. Çalakîye ame vîrvistene ke dewleta tirke Rojawan de her roje sîvîlan qetil kena û veng dîya ke wa warê hewayî yê Rojawanî bêro qefilnayene.

Bajarê Hamburg de zî bi eynî waştişî  hetê Meclîsê Cinîyan ê Rojbîne ra çalakîyêke ameye organîzekerdene. Çalakîye de bale ameye antene dişmenîya dewleta tirke yê vera cinîyan ser û ame vatene dewleta tirke ya îşxalkere seba ke nêeşkena gerîlayan hêrişê şarê sîvîlî kena û Ewropa zî vengê xo nêvejena. Cinîyan vat kurdî do çirey verê zextan de milê xo çewt nêkerê û tim pê têkoşînî cewabê hêrişan bidê.

Duisburg de zî seba ke Rojawan de sîvîlî yenê qetilkerdene hetê Meclîsê Cinîyan ê Asya Yuksel ra çalakîyêke ameye kerdene. Çalakîye de bêvengîya welatanê Ewropa ameye şermezarkerdene û ame vatene ganî hêzê mîyanneteweyîyî şirê Tirkîya ser ke verê nê şerî bigêrê.