Almanya, Fransa û Yunanistan de vizêr reyna hêrişê dewleta tirke yê pê çekanê kîmyewîyan ke verê kurdan yenê kerdene ameyî şermezarkerdene.

Paytextê Fransa Paris de ciwanan verê Kuleyê Eyfelî de çalakîya bêîteatîya sîvîle kerde. Polîsan hêriş kerd û ciwanî destbend kerdî.

Bajarê Rouenî yê Fransa de zî pê çalakîyêke şuxulnayîşê çekanê kîmyewîyan û bêvengîya welatanê Ewropa ameyî şermerzarkerdene.

Bajarê Sttutgartî yê Almanya de çalakîya xeyme ya çar rojan pê rayraşîyayîşêkî qedîyaye. Çalakîye de veng dîya dezgehanê eleqedaran ê mîyanneteweyîyî ke  wa berpirsîyarîya xo bîyarê ca.

Bajarê Pforzheimî yê Almanya de zî bi tewrbîyayîşê temsîlkaranê Partîya Çepe hêrişê kîmyewîyî ameyî şermezarkerdene û hukmatê Almanya ra ame waştene ke wa şiro Tirkîya ser ke verê hêrişan bêro birnayene.

Paytextê Yunanistanî Atina de zî serkêşîya TCŞyî de hêrişê kîmîyewîyî yê dewleta tirke ameyî şermezarkerdene.