Vervatoxa HDPyî Ebruye Gunay merkezê partîya xo de kombîyayîşê çapemenîye kerd û rojdem ercna.

Qiseykerdişê Gunaye ra beşêk wina yo:

''Krîzo ekonomîk û meseleyê komelkîyî benê giranêr, îqtîdar zî hêrişanê xo zêdîneno.  Îqtîdar ça de pêşnîyazêkê çareserîye est bo hêrişê ci keno. Mîsalê ney o tewr zelal zî polîtîkayê vera Îmraliyî yê. Eke Ocalan bikewo dewre îmkanê çareserîye û haştîye xurtêr benê. Îqtîdar çareserîye vera estbîyayîşê xo sey tehluke vîneno. Rijîyayîşê dewlete xemê înan de nîyo. Îqtîdar pê xorinkerdişê polîtîkayanê şerî wazeno xo mende bikero. Newroze de şarî waşt ke berê Îmraliyî bêrê akerdene û sey adresê çareserîye Birêz Ocalan nîşan kerd.

Muracatê pêvînayîşî yê keye û avûkatanê Ocalanî yenê redkerdene. 4ê Nîsane de zî bi seyan kesan waşt ke xo biresnê Amara la ê zî ameyî astengkerdene. Polîtîkaya tecrîdî Tirkîya çareserîye ra kena dûrî. Şarê kurdî mîyanê pêro şert û mercan de seba polîtîkayanê haştîye û çareserîye têkoşîn keno. Heta ke haştîye bêra caardene û berê Îmraliyî bêrê akerdene no têkoşîn do dewam bikero. No seba demokratîkbîyayîşê Tirkîya zî girîng o. Têkoşîn seba ney zî hewce yo.''