6 serrî verî 10ê teşrîna verêne ya 2015î de Meydanê Garî yê Anqara de Nawnayîşê Kede û Haştîye de DAÎŞî qirkerdişêko pîl kerd. Hêriş de 103 kesî ameyî qetilkerdene, 400 kesî zî birîndar bîyî.
Komeleya Paştdayîş û Haştîye ya 10ê Teşrîna Verêne ra Îhsan Seylanî serrgêra 6. ya Qirkerdişê Garî de ANFyî rê qisey kerd.

Seylanî pare kerd ke her menge saete 10:40 de ê meydan de yê û vat: ''Her hetê Tirkîya ra keyeyî yenê. Prosesê huqûqî zî dewam keno la tede kêmasîyî estê û mesuldarê qirkerdişî hema zî nênê muhakemekerdene. Hema zî dêsanê Garî de gonîya qurbanan esta. Destûr nêdîyeno ke qurbanî bêrê yadkerdene. No zî merdiman dejneno.

37 şaristanan de cenazayî ameyî definkerdene. Nê cenazayî pê alaya haştîye ameybî girewtene. Heta ke proseso asayî bibo, ceza bidîya sûcdaran, şînê dadîyan biqedo ma do verê Garî yê Anqara de bibê. Heta ke no qirkerdiş bêro zelalkerdene ma do xîret bikerê.''

Seylanî ard ziwan ke prosesê mehkeme bi hawayêkê akerdeyî nêno kerdene û vat: ''Gerrenameyanê avûkatan ra ber bi seyan klasorî ameyî pêşkêşkerdene labelê nêameyî qebulkerdene. Versûcê DAÎŞî ameyî muhakemekerdene, ceza dîyaye înan labelê 26 versûcî estê, êyê ke remayî estê. Yanî pîyonî ameyî muhakemekerdene la mesuldarî nêameyî dîyene. Coka prosesê mehkeme goreyê zerrîya ma nîyo. Ez venga her kesî dana ke wa tewrê vîrardişî bibê. Paştdayîş û vîrardiş dejan derman bikerê û verê qirkerdişanê bînan bigêrê.''