Hemserekê HDPyî yê Mêrdînî Salih Kudayî ANFyî rê tecrîdê vera Rayberê Şarê Kurdî Abdullah Ocalanî ser o qisey kerd. 

Kudayî vist vîrî ke Abdullah Ocalan 23 serrrî yo îmrali de yeno tecrîdkerdene û 2011 ra nata nêeşkeno avûkatanê xo bivîno.

Kudayî vat: ''Ganî tecrîd sey bahaneyêka şerî bêro qebulkerdene. Key tecrîd yeno kerdene Kurdîstan, Tirkîya û Rojhelatê Mîyanênî de şer beno giranêr. Coka ma wazenê şert û mercê Birêz Ocalanî bêrê sereraştkerdene. Wexto ke tecrîd amebi kerdene birazîyê mi û lajê mi dinyaya xo bedilnaye. Xora Birêz Ocalanî vatêne o eşkeno mîyanê hewteyêkî de şerî biqedîno. Tirkîya û Kurdîstan de her keyeyî parçeyê xo dayo nê şerî. Coka ganî goş bêro dayene Ocalanî ser.''

Kudayî bale ante ser ke bingeyê pêro meseleyan de tecrîdê Îmraliyî esto û vat: ''Tecrîd û şer bi hawayêkê xirabî tesîrê ekonomî, psîkolojîya komelî, têkilîyanê şarî kenê. Eke ewro nîjadperestîye resaya asta tewr berze û bena sebebê mergî sebebê ci tecrîd o. Coka tecrîd ganî her hetî ra bêro ercnayene û no huqûqê dişmenîye ra fek bêro veradayene.''

Kudayî ard ziwan ke Îmrali Tirkîya rê sey laboratuwar o, tecrîd tîya de ameyo afernayene û pêro welatî ra ameyo vilakerdene. Kudayî vat: ''Vera şarê kurdî û hêzanê demokraî polîtîkaya tecrîdî yena caardene. Tedaya vera partîya ma caardişêkê tecridî yo. Bingeyê îzolekerdişê HDPyî de tesîrê polîtîkayanê tecrîdî esto. Eke Tirkîya de qala haştîye, demokrasî û wayûbiratîye do bêra kerdene ganî verî tecrîdê vera Ocalanî bêro wedaritene. Heta ke tecrîd dewam bikero meseleyî zî dewam kenê.''