Keyeyan û merdimanê tepişteyan ê ke 219 rojî yo Amed de Nobeta Edaletî de yê, verê bînaya  Dezgehê Tipê Edlîyî de waşt ke wa tepişteyê nêweş û cezaya ci qedîyaya bêrê veradayene.

Komeleya Paştdayîşê Keyayanê ke Merdimê  xo Vînî Kerdî (MEBYA DER), MED-TUHAD-FED, DBP, HP û TUAY-DERî zî paştî daye çalakîye.

Merdimanê tepişteyan ra Herdeme Mervanî eşkerayîye wende û vat: ''Tepişteyê nêweşî nênê tedawîkerdene, ma 8 mengî yo qîrenê. Veranêdîyayîşê înan têna sûcê Dezgehê Tipê Edlîyî nê, sûcê pêro partîyan û Wezîrîya Edaletî yo. Ê zî hemkarê nê sûcî yê.  Heta ke tepişteyê ma bêrê veradayene û tedawîkerdene ma do çalakîye de bibê.''

Merdimanê tepişteyan ra Reşahate Ada vat: ''Heta çilka peyêne ya gonîya xo ma do hetê tepişteyan de bibê.'' 

Eşkerayîye pê slogananê sey 'heq, huqûq, edalet', 'biciwîyo xoverdayîşê zîndanan' û pê çepikan qedîyaye.