Kurdê ke Îstanbul de yê nerazîbîyayîşê xo yê galê Dewleta Tirkan û cerganê aye yê vera Rojawanî nîşan da û seba yewîya neteweyî veng da. Kurdîstanijan dîyar kerd ke tarîxî de zaf rey galê kurdan kerdo û vat: “Kurdî vera komkîştîşê Rojawanî reya verî ya ke pêro pîya  yew helwest nîşan danê. 

Mehmet Şahînî ard ziwan ke vera galanê Deleta Tirkan yê Rojawanî hişmendîya neteweyî yê kurdan reyna vejîya vernîye û vat: “Kurdê ke  bi seyan serre yo ke nêeşkenê bibê netewe nika reya verî ya ke ênê pêser. Nika ra pey kam se vano wa vajo kes êdî bi kurdan nêeşkeno. Komkiştiş  û zulmo ke yeno kerdene pê hêzê nê şarê êdî nêeşkeno. Yewîya neteweyî seba kurdan êdî qase nan û awe girîng a. Gama ke merdim bala xo dano pêro parçeyanê Kurdîstanî, gama ke merdim bala xo dano Ewrupa û her hetê dinya  vîneno ke serebûtê ke Rojawanî de qewemîyenê pêro kurdî ardê pêser. Pêameyîşê yewîya kurdan hêvîya ma ya.”

Bê xoverdayîşê verê şerî nêno girewtene 

Mûrat Yilmazî dîyar kerd ke asîmîlasyon dewam keno û wazenê ke kurdan bêveng kerê. Yilmazî nîşan kerd ke ciwanê kurdan cewab danê galan û ganî ê Vakur, Rojawan, Rojhelat û Başûrî de bêrê pêser û bi nê hawayî şar çîyêk bikero. 

Hîkmet Seyrekî zî vat: “Nê galan ra dima seba ke kurdî bêrê pêser herey zî mendî” û dîyar kerd, “Bêguman ma kurdî vera şerî yê. Labelê bê xoverdayîşî şer nêno vindarnayene. Her se serran de reyê vera kurdan kay yeno kaykerdene. Çimê mi de kurdî do nê prosesî de mekewerê dafike.”

Vakur gore bi parçeyanê bînan pey de mend

Gokhan Arslanî zî ard ziwan ke kurdê Vakurî gore parçeyanê bînan pey de mendî û nîşan kerd ke galê Tirkîya nênê qebulkerdene. Aslanî vat: “Qirkerdişo ke Tirkîya nika Rojawanî de kena vera kurdan o. Bi xebetnayîşê çekanê kîmyewî û kîştişê merdiman vana ke a emnîyetê xo pawena. Ma naye qebul nêkenê.”