Nobeta Azadîye  ya ke semedê azadîya fîzîkîye ya Rayberê Şarê Kurdî Abdullah Ocalanî  25ê hezîrana 2012yî de bajarê Strasbourgî yê Fransa de dîyaye destpêkerdene hewteyê 532. de dewam kena.

No hewte endamanê TJK-E yê Bremenî nobete dewr girewte.Koma nobete de Xezale Yalçin, Aynûre Kiliç, Xecê Aslan, Selma Koç û Emîne Demîr ca gênê.

Vervatoxa kome Xezale Yalçin nameyê kome ser o eşkerayîye daye û vat: ''Seke zanîyeno 10 serrî yo ma tîya de nobete gênê. Çend serrî yo destûr nêdîyeno ke Abdullah Ocalan avûkatanê xo bivîno. Ma nêeşkenê Rayberîya xo ra xeberêke bigêrê. O bi hawayêkê bêhuqûqî tepişîyeno. Ma wazenê Rayberê ma azad bibo. Heta ke Ocalan azad nêbo meseleya kurdan zî do çareser nêba.

Ma sey cinîyan felsefeya Rayber Apoyî de azadîya cinîyan dîye. Ma venga cinîyan û pêro merdimîye, bi taybetî Konseya Ewropa danê ke edalet ça de yo. Dewleta Fransa 10 serran o cayêk nêda ke nobetdarê azadîye tede bimanê.  Eke kurdî nêbê yew, wayîrê yewbînan nêvejîyê çew heqî nêdano ma. 

Bi rojan o gazê kîmyewîye û gazê jehrînî erzîyenê ma ser. Rojawan de, Garê de, Herêmanê Pawitişî yê Medya de şar dîyeno bombayan ver, çeka kîmyewîye şuxilîyena. La dewletê ke xo sey demokratîkî pênase kenê, vera nê hêrişan vengê xo nêkenê. Ma venga pêro demokratan, bi taybetî rêxistinanê mîyanneteweyîyan û dewletanê averşîyayeyan danê ke bikerê ke Rayberê ma avûkatanê xo bivîno. Heqê pêvînayîşî heqo meşrû yo. Çira nê dewletî bêveng ê? Ma bêvengîya dewletan şermezar kenê. Heta ke ma weş bê ma do Rayberê xo reyde bibê.''