Heyetê Îmraliyî yê DEM Partî yo ke partîyanê sîyasîyan de pêvînayîşî kerdî eşkerayîyêke daye. Eşkerayîye wina ya:

''28ê kanûna 2024î de Ma Birêz Ocalanî reyde pêvînayîş kerd, dima ma waştişê ey ser o partîyanê Meclîsî, partîyanê bînan û embazanê xo yê tepişteyan de qisey kerd.

Ma Serekê Meclîsî Numan Kurtulmuşî, MHP, Partîya Gelecekî, AKP, Partîya Saadetî, CHP, Partîya Deva û Partîya Yeniden Refahî reyde pêvînayîşî kerd. 11-12ê çeleyî de ma zîndanan de Fîgene Yuksekdag, Selahattîn Demîrtaş, Leyla Guven û Selçuk Mizrakliyî reyde pêvînayîşî kerdî.

Pêvînayîşê ma bingeyê dîyalog û haştîye de dîyayî destpêkerdene û dewam kenê. Ma nê pêro partîyan rê sipas kenê ke înan ma qebul kerdê û fikrê xo ma de pare kerdê. 

Rojdemê zîyaretanê ma de babetê pêvînayîşanê bi Birêz Ocalanî û ercnayîşê rewşe est bîyî. Nê babetî bi kilmî wina yê; îrade û waştişê Birêz Ocalanî yê seba çareserîya meseleya kurdan, mesuldarîya curtkerdişê wayûbiratîya kurdan û tirkan, qewimîyayîşê Rojhelatê Mîyanênî û zemînê MEclîsî û sîyasetê demokratîkî yê seba çareserîye. 

Hema hema pêro pêvînayîşî bi pozîtîfî û hêvîdarî derbaz bîyî. Heyet û lîderanê partîyan pare kerd ke ê do destek bidê prosesê haştîye la qesawet û pêşnîyazê xo zî pare kerdî. Bi hemparî ame vatene ke ganî proses bi zelalî û serkêşîya Meclîsî de bêro kerdene. 

Nê pêvînayîşan de ma dî ke pêro partîyê sîyasîyî wazenê ke prosesê pêkewtişan biqedo, wayûbiratîye bêro averberdene û prosesê haştîye wa bibo wesîleya demokratîkbîyayîşî.

Zîndanan de zî pêvînayîşê ma yê bi embazanê ma bi pozîtîfî derbaz bîyî. Embazanê ma bi zelalî paştî daye porses, rolanê Birêz OCalanî û partîya ma. Embazanê ma îfade kerd ke çi bikewo milê înan nê prosesî de do bikerê.

Ge ge ma medya de ziwanêkê cîyakerî û uslubêkê neweşî vînenê ke nê tewirî warê spekulasyonan hîra kenê û karê ma zî zehmet kenê. Ma zanenê ke her kes de hem hêvî û waştiş hem zî qesawet û hesasîyet est ê. Coka spekulasyon û zûrî tena şerî rê fayde kenê.

Ma do wextêkê tewr nêzdî de ancî Birêz Ocalanî zîyaret bikerê û seba ke proses bi hawayêkê weşî bireso haştîye xîret bikerê.

Eke destekê rayaumûmîye yê seba nê xîretanê ma dewam bikero no do seba awankerdişê haştî û çareserîye de bibê kerraya tewr qîmetêne.

Bi heskerdiş û rêzî.''