Heyetê HDPyî ke wekîlî Meral Daniş Beştaş, Huda Kaya, Tulay Hatimogullari, Siddik Taş, Garo Paylan, Hîşyar Ozsoy, Omer Faruk Gergerlioglu tede ca genê Newala Qesaba de eşkerayîya çapemenîye daye.

Beştaşe nê vatî: ''Seba ke dola Newala Qesaba de serê goranê komkîyan de bînayî yenê viraştene ma ameyî tîya. Nê bînayî serê goranê komkîyan de  yenê viraştene. Tîya mekanê vîrê komkîyî yo. Ma sey hewt wekîlan kewtî rayîr cadê nuqtayê kontrolî ameyî ronayene. Nika zî hêzê dewlete kenê ke nêrazîbîyayîşê ma şarî ra binimnê. Vera wekîlan bêhurmetîye kenê, sûc kenê. Ê zî zaf hol zanê ke no sîyasetê tersnayîşî tesîrê ma nêkeno. Ma heqdar ê û heqdarî çirey nêtersenê. Newela Qesaba mekanê vîrê tarîxkî yo. 89 de kendişê kilmî de hewt cesedî ameyî dîyene. Walîyê dewrî bi femanêkî no kendiş vindarna. Dima ra tîya rayîrî viraştî, mektebê polîsana viraştî ke nê mekanê vîrî çîn bikerê.  Ercê merdimîye binpay kerdî ke serê heqîqetî bê kerreyan bîgêrê.

Gama ke şaredarîye binê îdareyê ma de bî, pêro desturê viraştişê bînayan ameybî betalkerdene.  Dima ke qeyûm ame cade dest pê nê karî kerd. Vanê tîya mulko taybet o. Beno ke mulko taybet o, ma xora nêwazenê zirar bidê nê mulkî. Ganî dewlete kerdişanê xo de bêro têrî. Ma zanê ke tîya de bi seyan cenazayî estê. 1915 de ermenî û keldanîyî û serranê 90yan de kurdê ke ameyî qetilkerdene tîya de ameyî definkerdene. Ma veng danê heme rêxistinanê heqanê merdiman, baroyan, rêxistinanê komelê demokratîkî bêrê ma pêro pîya verê nê sûco ke yeno waştene bêro kerdene vindarnê. Şarê Sêrtî nêeşkeno serê goran de biciwîyo. Şarê Sêrtî vîranê xo rê hurmet keno, destûr nêdeno çîyo winayên bêro kerdene. Ma veng danê şarê Sêrtî ke wayîrê vîrê xo û ercanê merdimîye vejîyê.''

Hîşyar Ozsoyî zî wina qisey kerd: ''Newala Qesaba têna semedê Sêrtî nê  dejê heme herême yo. Seba ke yew şîrket çend quruşan qezenc bikero, rant bifîno dest biewnê na rewşa rezîle ra. Ma wina yew şarê ke verê goristanan de bi vengê berzî qal nêkenê. Her kes zano ke tîya gorî est ê.  Nê welat de merdeyan rê hurmet est o. Çew nêewnîyeno nasnameyan ra. Nika serê goran de wesayîtê gureyî xebiteyenê. Dinyaya bîne de zî hesabê naye est o.  Şima vanê qey şarê Sêrtî serê estayan de domananê xo pîl keno? Na senî yew nêzanîye ya. Waştişê ma no yo;  Newela Qesaba de çîyo bîyo wa bêro eşkerakerdene. Çimê ma erdê çewî de çîn o. Senî ke ma zanê 300 û goreyê hukmatî 186 cenazayî tîya est ê. Xora şima her ca de bînayî vîlayî viraştî qenî serê goran de mevirazê. Şar 30 serrî yo gereno goranê xo, estayanê xo wazeno. 30 serrî yo bi hezaran lawîkî erzîyayî Newela Qesaba ser. Baroyan zî eşkerayîye daye. Wa verî nê esteyî bêrê vetene, nasnemeyî bêrê bewlîkerdene û teslîmê merdimanê înan bibê, dima ra şima çi virazenê bivirazê.''