Heyeto Pêroyî yê HDKyî: Mefteyê azadîye Îmrali de yo

Hemvervatoxa HDKyî Îdîle Ugurlu Heyetê Pêroyî yê 11. de qisey kerd û vat: ''Wedarnayîşê tecrîdî seba pêro şaran do bibo çareserîye. Mefteyê ma yê azadîye Îmrali de yo.''

Heyeto Pêroyî yo 11. ê HDKyî salona înan a Avcilarî de yeno kerdene. Hemvervatoxê HDKyî Îdîle Ugurlu û Sedat Şenoglu, Hemserekê Konfreya Komelê Demokratîkî (KCD) Berdan Ozturk, Hemsereka DBPyî Salîha Aydenîz û Keskîn Bayindir, Hemserekê HDPyî Mîtgat Sancar, Wekîlê HDPyî Gulîstane Kiliç Koçyîgît, Alîcan Onlu, Musa Pîroglu, Alî Kenanoglu û xeylêk hemwelatîyî tewrê heyetî bîyî.

Verî Wekîle Gulîstane Kiliç Koçyîgît qisey kerd. Koçyîgîte ard ziwan ke AKP rixmê pêro kerdişanê xo yê xiraban û xîretan zî qels bîyo û rijîyeno.

Dima Hemvervatoxa HDKyî Îdîle Ugurlu qisey kerd. Ugurlu vat: ''HDK rayîro 3. o. Ronayoxê fikrê HDKyî ho Îmrali de binê tecrîdêkê giranî de yo.Wedarnayîşê tecrîdî seba pêro şaran do bibo çareserîye. Mefteyê ma yê azadîye ho Îmrali de yo. Îqtîdar key biwazo nê berî akeno la dima cade cano ra. Sîstemo faşîst wazeno berê HDPyî biqefilno. No vera şarî hêrişêko topyekûn o.''

Hemvervatoxê HDKyî Sedat Şenogluyî zî pare kerd ke ê do demokrasî, paştdayîş, azadîye înşa bikerê û tarîtîye vila bikerê.

Hemserekê Pêroyî yê HDPyî Mîthat Sancarî zî vat: ''Ewro wina aseno ke konseptê şerê topyekûnî yê 2015î ho bin keweno. Tecrîd zî netîceya nê şerî yo. Key prosesê çareserîye qedîya nê şerî dest pêkerd. Semedo ke dewlete seba çaresernêkerdişê meseleya kurdan gladio xebitna no şer û na mesele ewro hîna bîyî giranêr. Ganî ma nê şîyayîşî vindarnê. HDPyo ke no îqtîdar kerdo qels ma do heta peyên ey bipawê. Ma do qetî ser bikewê. Heta ke têkoşîn, xoverdayîşê ma bibê hêvîya ma zî do pîl biba, rayîrê ma hîna akerde bibo. Ma do qetî ser bikewê.''