Endamê Komîteya Merkezî ya PKKyî Cemal Şerîkî bi wesîleya serrgêra Darbeya Leşkerî ya 12ê Êlula 1980î ANFyî rê qisey kerd.

Qiseykerdişê Şerîkî ra tay noqtayê girîngî wina yê:

''Rayber Apo Îmrali de mîyanê tecrîdêkê giranî de yo. La o xo reyna zî sey merdimê tewr azadî hîs keno. No mîyanê têgêrayîşê Apogîran de mîyanê şertanê Darbeya 12ê Êlule de wina bi. Hêzê ke bi Darbeya 12ê êlule kewtî peyê tasfîyeya PKKyî û qirkerdişê kurdan manenê îqtîdarê AKP-MHPyî yê nikayênî. Hêzê peyê 12ê Êlule û hêzê peyê dîktatorîya AKP-MHPyî ya faşîste heman ê.

Têgêrayîşê Apogîrî Darbeya 12ê Adara 1971î ra dima dest pêkerd. Kerdoxanê Darbeya 12ê êlula 1980î waşt ke darbeya 12ê Adare ya nêmcete temam bikerê. Dîktatorîya AKP-MHPyî ewro serê rêçê darbekeran de têgêreno û plananê CIA û NATOyî ano ca. Armancê Darbeya 12ê Êlule yo esas û ê AKP-MHPyî çinkerdişê Rayber Apo, PKK û şarê kurdî yo.

Wextê Darbeya 12ê Êlule de îşkenceyê giranî ameyî kerdene. Dişmenî kerd ke pê kerdişanê xiraban, teda û îşkenceyî xoverdayîşê Apogîran bişikno. Xora destpêk de hedefê înan zî Rayber Apo bi. La Rayber Apo darbe ra ver seba amadekarîya têkoşînêkê dergî vejîyabi teberê welatî. Rayber Apoyî teberê welatî de şorişgêran de têkilîye ronaye, xetêka têkoşînî awan kerde û PKKgîrî rêxistin kerdî. Bi nê hawayî PKKyî vera Darbeya 12ê Êlule estbîyayîşê xo pawit. Kadroyanê PKKyî û şarê ma zî zîndanan de xo ver da. Faşîzmê 12ê Êlule hetê nê xoverdayîşan ra ame pûçkerdene.

Gerîlayan xoverdayîşê zîndanan dewr girewt û ê nika nê xoverdayîşî ver bi serkewtişî benê. Gerîlayî do nêverdê ke armancê Darbeya 12ê Êlule ser bikewê. Ganî ma bi zelalî îfade bikerê ke prosesê 12ê Êlule hema nêqedîyayo. Zîndanan de zulm dewam keno. Dewleta tirke ya faşîste bi giranî hêrişê tepişteyan kena û embazê ma zî xo ver danê. 

Şexsê Rayber Apoyî de vera şarê ma hêrişî dewam kenê. Ganî vera nê faşîzmî tradîsyonê xoverdayîşê vera 12ê Êlule bêro teqîbkerdene. Ganî ma vera tecrîdî, zulmê serê zîndanan û pêro hêrişan bi hawayêkê xurtî têkoşîn bikerê. No yew wezîfeyê ma her kesî yo. Seba ney zî ganî vera teqîbkerdoxanê 12ê Êlule bi hawayêkê tewr aktîfî têkoşîn bêro kerdene. Ganî serrgêra newîye ya Darbeya 12ê Êlule de no wezîfe û mesuldarî bi hawayêkê raştî bêro caardene.''