Rêxistina Çimdayî ya Heqanê Merdiman (HRW) derheqê dormê ci girewtişê Wargehê Bextwaştoxan ê Şehîd Rustem Cudî yo (Mexmûr) ke 4 aşman ra zêdêr o dewam keno yew rapore weşanaye. 

HRWyî raporî de behsê rayîrgirewtiş û astengîyanê ke Rayraberdişê Herêma Kurdîstanî dano verê roniştoxanê Wargehê Mexmûrî yeno kerdene.  Raporî de wina êno vatene “Hêzê Emnîyetî yê Hukmatê Herêma Kurdîstanî yê Iraqî mîyanê nêmeyê aşma temmuza serra 2019î ra bîyo bi hawayêkê herêmî, tevger û ameyîşûşîyayîş ê bextwaştoxan ê Wargehê Mexmurî yo ke kurdê ke Vakurê Kurdîstanî ra ameyî  tede ciwîyenê ser o ambargo nayo ro.” 

Reyna Berpirsîyara Rêxistina Çimdarî ya Heqanê Merdiman (HRW) a Rojhelatê Mîyanênî Sarah Leah Whitsone wina nîşan kerd “Rayraberdişê Hukmatê Herêma Kurdîstanî nêeşkeno her kesî yo ke wargehî de yo ceza biko. Çunke taye merdimî eşkenê dilsozê PKKyî bê, eke delîl çin o ke înan suc kerdo çew nêeşkeno ke seke ê sucdar bê tev bigero. No ambargoyo ke roniştoxanê wargehî ser o ameyo ronayene wina kerdo ke kes nêeşkeno şoro kar û neweşxaneyan.” 

Berpirsîyara Rêxistina Çimdarî ya Heqanê Merdiman (HRW) a Rojhelatê Mîyanênî Sarah Leah Whitsone rexneyê tujî Rayraberdişê Hukmatê Herêma Kurdîstanî rê kerdî û wina dîyar kerd “Merdim beno şok û matmaye maneno ke heta nika zî Rayraberdişê Hukmatê Herêma Kurdîstanî peynîya sînorkerdişê heqê ameyîşûşîyayîş ê bextwaştoxan nêarda.”

Gore raporî koordînatorê Hukmatê Herêmê Kurdîstanî yê seba parêznayîşê mîyanneteweyî Dindar Zebarî, roja 30 teşrîna verêne cewab da persnameya HRWyî ya derheqê rewşe û dîyar kerd ke selehîyetdarê hukmatî seba “problemanê emnîyetî” “tevgerê roniştoxanê kampî taye sînor kerdê.”

Peynîya raporî de yeno vatene ke gore peymana mîyanneteweyî lazim o ke Hukmatê Herêma Kurdîstanî heqê azadîya roniştoxbîyayîş, ameyîşûşîyayîş ê şarê herêma ke binê kontrolê xo de ya bîyaro ca.