Dima ke berpirsîyaranê MÎTî yê herême ra Osman Kose şaristanê Hewlêrî yê Başûrê Kurdîstanî de 17ê temmuza 2019î de ame kiştene, PDKyî no serebût bahane kerd û vera Kampa Multecîyan a Mexmûrî ambargoyêk da destpêkerdene. Ambargo de destûr nêno dayene ke merdimê nêweşî, cinîyê diganî, wendekar û karkerî kampe ra bivejîyê.

Partîya Çepe ya Meclîsê Federalî yê Almanya peynîya menga sibate de babete viste rojdemê meclîsî û tay persî hukmatê Merkele ra persayî.

Şêwirmendê Wezîrê Karanê Teberî Andreas Michaelisî cewab da persan. Derheqê zafînanê persan de cewabê ''Destê hukmatê ma de zanayîş û dokumentê na babete çin ê'' yan zî ''sirê dewlete yo'' ame dayene. Derheqê ambargoyê 9 mengan ê Mexmûrî de zî cewabê ecebî ameyî dayene.

Wezaretê Karanê Teberî yê Almanya îdîa kerd ke goreyê zanayîşanê ke Komîserîya Berze ya Multecîyan a Neteweyanê Yewbîyayeyan (UNHCR) ameyî girewtene, roniştoxê Mexmûrî seba çareserkerdişê meseleyanê weşîye yan zî perwerdetî şinê Hewlêrî û yenê. Wezaretî îdîa kerd ke roniştoxî bêproblem eşkenê şorê qezaya Nînova, şaristananê Kerkûk û Silêmanîye.

Rixmê îdîayanê hukmatê Almnya bi seyan nêweşê kronîkî yê kampe nêeşkenê kampe ra bivejîyê û meseleyê xo yê weşîye bi kezî çareser bikerê. Goreyê cigêrayîşê ANFyî domananê cinîyan ê diganan Fatma Hacî Hiseyn, Ezîme Ehemed Lewînd, Fatma Soro Qutas û Newroze Ehmed rîyê ambargoyî ra dinyaya xo bedilnayî. Hetê bînî ra wendekarî xwendekar Amed Saleh, Newroz Derwêş, Sanya Niyazî, Dilşad Sîmal, Bêrîtan Tok, Mizgîn Kazim, Mihemed Ebdulah, Heyat Telîf, Hêvîdar Sedîq û Heyat Reşîd zî astengîya asayîşê PDKyî ra nêeşkenê perwerdeyê xo yê Zanîngehê Hewlêrî de temam bikerê.

Wezaretê Karanê Teberî yê Almanya seba îdîayanê xo UNHCR sey çime mojneno. Labelê dokumentê ke UNHCR îdîa kena ke hetkarîya Mexmûrî kena mojneno ke no zanayîş raşt nîyo. Eşekera bi ke dezgehê hetkarîye yê multecîyan ê Neteweyanê Yewbîyayeyan  tewr peyên 13ê tebaxa 2015î de hetkarîya roniştoxanê kampe kerd.