Goreyê doneyanê TUÎK’î pêroyîya Tirkîya de nisbetê bêkarîye yê 15 serrî ra corî menga Sibate de resa 14.7’î.

Goreyê serrewextê parî hûmara bêkaran 1 mîlyon û 376 hezarî bîye vêşî, pêro pîya bîye 4 mîlyon û 730 hezarî.

Bi menga Çele ya 2019’î hûmara bêkaran, goreyê heman serrewextê parî 1 mîlyon û 259 hezarî bîbî vêşî û resabî 4 mîlyon û 668 hezarî kesan. Nisbetê bêkarîye yo pêroyî bi vêşîbîyayîşê 3,9 pûanî bibi se ra 14,7.

Doneyê TUÎK’î ramojnenê ke kesê ke bîyê wayîrê karî serrewextê Sibat a serra 2019’î de, goreyê heman menge ya parî 811 hezarî bîye kemî û bîye 27 mîlyon û 355 hezarî kesî. Nisbetê îstîhdamî zî bi kemîbîyayîşê 1,8 pûanî bi se ra 44,8.

Bêkarîya Rastekîne 7 Mîlyon Kesî yê

Goreyê Partîya Şaran a Demokratîke (HDP) bêkarîye rastekîne hîna vêşî ya. Dimayo ke TUÎK’î doneyê bêkarîye yê menga Çele eşkera kerdî, hetkarê hemserekê pêroyîye û mesuldarê Polîtîkayanê Ked, Ekonomî, Zîret û Cimatî yê HDP’yî Gunay Kûbîlayî beyanatêk dabi û vatibi, “Eksê doneyanê TUÎK’î yê ke îqtîdarî pawenê, Tirkîya de hûmara bêkaran a rastekîne resaye 7 mîlyon kesan. Tena menga peyêne de 400 hezar kesî bêkar mendî.”