Nobeta Ocalanî rê Azadîye 25ê hezîrana 2012î ra nata şaristanê Sutrasbourgî yê Fransa de hetê kurdîstanijan ra yena kerdene. 

Hewteyê 487. de hunermendanê TEV-ÇANDî Hozan Seyîdxan, Şanoger Emele, Tûncer Yalinkiliç û Semyan Adar nobete dewr girewte.

Şanoger Emeleyî nameyê kome ser o qisey kerd û vist vîrî ke 10 serrî yo kurdîstanijî û dostê înan cayanê cîyayan ê Ewropa de çalakîyan kenê. Emeleyî ard ziwan ke Ewropa îdîa kena ke demokrasî û heqanê merdiman pawena la tecrîdê vera Rayberê Şarê Kurdî Abdullah Ocalanî çin hesibnena.

Emeleyî da zanayene ke Tirkîya Peymana Heqanê Merdiman a Ewropa binpay kena û venga dezgehanê Ewropa da ke vera tecrîdî cade têbigêrê.

Emeleyî vat: ''Şexsê Rayber Apoyî de tecrîd şarê ma rê yeno ferzkerdene, ma nê tecrîdî şermezar kenê. Wa CPT şoro Îmrali û eşkerayîye bido şarê kurdî. Ma venga şarê xo danê ke dormeyê Rayberîye de kom bibo. Heta ke Rayberê ma azad nêbo qirkerdişê vera kurda do dewam bikerê. Wa şarê ma verê xo bidê çeperanê xoverdayîşî.''