Hunermendanê Merkezê Kulturî yê Mezopotamya bi wesîleya serrgêra ronayîşê 30. ya MKMyî vizêr Merkezê Kulturî yê Bostanci de konserêk do bidayêne la Qeymeqamîya Kadikoyî vizêr konser qedexe kerd.

Hunermendê MKMyî yê Amedî qezaya Sûrî de Komeleya Huner û Kulturî yê Firatî de ameyî pêser û înan eşkerayîyêke daye. Endama MKMyî Devrîme Demîr eşkerayîye wende û pare kerd ke ê 30 serrî yo xo ver danê ke bi kurdkî huner û muzîkî bikerê. Devrîme vat: ''Ma semedê ney zaf bedelî dayî û do bidê. Pê vatişê şima yê înkarî ziwan û kulturê kurdan çin nêbenê. Kurdî tim wayîrê kultur û ziwanê xo vejîyê. Êyê ke vanê 'meseleya kurdan çin a yan zî çareser bîya' zûre kenê. Ma sey hunermendanê MKMyî soz danê ke ziwan, kultur û hunerê xo meteriknê.''

Eşkerayîye pê tîlîlî û çepikan qedîyaye.