Nobeta edaletî ya Keyeyê Şenyaşarî verê Edlîyaya Riha de roja 380. de dewam kena. Seba Vergirewtişê Şerî Yewîya Doktoran a Mîyanneteweyîye (IIPNW) nobeta edaletî ya Keyeyê Şenyaşarî zîyaret kerde.

Hetkara Serekê Baroyê Riha Fazîlete Taştan Arserîm zî heyet de şîye nobeta edaletî. Ferît Şenyaşarî derheqê qirkerdişê vera înan û nobete de agahîyî dayî heyetî. Şenyaşarî da zanayene ke mîyanê nê qirkerdişî de wekîlê AKPyî est o coka serê qirkerdişî yeno girewtene.

Ferît Şenyaşarî vat: ''Verê çimanê dadîya mi de no qirkerdiş ame kerdene. 4 serrî bîyo la hema zî dosya nimite ya û yew kes zî nêtepişîya.''

Nameyê heyetî ser o Endama IPPNWyî Dr. Mede Gisela Penteker qisey kerd û vat: ''Şima pê nobeta xo hem wazenê faîlî bitepişîyê hem zî edaletî wazenê. Heta ke edalet nêro caardene şima nêeşkenê keyeyê xo de ronişê. Key ma abigêrê raporê xo amade bikerê û çimdarîya xo binusê. Ma wazenê nobeta şima ser o zî binusê.''

Dayîke Emîne Şenyaşar wexto ke qala qirkerdişî kerdêne bermaye. Heyetî goş na aye ser. Heyetî a hele vera polîsanê ke dîmenî girewtêne nêrazîbîyayîşê xo mojna û vat: ''Ma sey doktoran pêvînayîşî kenê. No binpaykerdişê cuya şexsîye yo.'' Heyetî bi nê hawayî polîsî kerdî dûrî.