Heyetê Pêroyî yê Yewîya Mîyanparlamentoyan (IPU) roniştişê xo yo 144. Endonezya de kerd. Nameyê HDPyî ser o Hemvervatoxê Komîsyonê Karanê Teberî yê HDPyî Hişyar Ozsoy tewrê roniştişî bi.

Komîteya Heqanê Merdiman a IPUyî netîceya kombîyayîşê xo yê çele-sibate de derheqê wekîlanê tepişteyan ê HDPyî de bire girewte. Komîte heta nika rewşê 64 wekîlanê HDPyî teqîb kerdî. Komîte bire daye ke rewşa Gultan Kişanak Amedê û wekîla HDPyî Semra Guzel zî teqîb bikera.

Komîte vist vîrî ke 20ê gulana 2016î ra nata 600 ra zêdêr sûcdarîyê terorî wekîlanê HDPyî rê ameyî kerdene û 2018 ra nata derheqê 30 wekîlanê HDPyî de bire tepiştişî dîyaye, 13 wekîlî wekîlîye ra ameyî dûrvistene û beno ke na hûmare zêde biba.

Komîte bale ante rewşa Aysele Tugluk ser û waşt ke cade a bêra veradayene. Derheqê Selahattîn Demîrtaş û Fîgene Yuksekdag de zî ame vatene ke dosyaya înan sîyasî ya.

Komîte vat: ''Komîte venga dezgehanê Tirkîya dana ke çarçewa Peymana Heqanê Merdiman de têbigêra. Ma veng danê ke Aysele Tugluka ke rewşa ci bena giranêr wa cade bêra veradayene. Komîte venga Meclîsî dana ke wa heqê destpanêdayîşê wekîlan bipawo.''