Hemserekê Komeleya Paştdayîşî û Hetkarîya Keyeyanê ke Anatolia de Merdimê Xo Kerdî Vînî (ANYAKAY-DER) Şehmus Işıkî hêrişê vera goristanan û cenzayan ANFyî rê ercnayî.

Işikî pare kerd ke texrîbkerdişê Goristanê Garzanî, tira remnayîşê cenazayan beşêkê konseptê şerî yo. Işikî vist vîrî ke roşanî ra verî zî sey Garzan hêrişê goristanê Licê amebi kerdene û warê goristanî de zî darî ameybî vêşnayene.

Işikî vat: ''Nê hêrişî travmaya keyeyan pîlêr kenê û dewlete bi nê hêrişan armanc kena ke vîrameyîşê cenazayan zî werte ra wedara. Ma her roje vera nê hêrişan muracatan kenê. Cenazayî yenê remnayene, morgan de yenê veradayene, bi bahaneya testê DNA cenazayî teslîm nêbenê. Nê pêro kerdişî keyeyan rê îşkence yê. Gelo bi kargo erşawîyayîşê cenazaya Egîd Îpekî seba keyeyê ci yeno çi mana? Ganî komel naye ser o bifikiro.

No zulmo ke keyeyan rê yeno kerdene, qet qebul nêbeno. Dewlete bi dişmenîya vera cenazayan mesaj dana ke a nêverdena ma şînê xo bikerê, cenazayanê xo bigêrê. Kerdişê winasênî qet yew dîn û bawerîye de çin ê. Nêbeno ke goreyê konjokturê sîyasî çew nêzdîyê cenazayan bibo.''