Endamê Komîteya Rayberdişî ya PKKyî Duran Kalkanî Medya Haber TV de rojdem ercna. Qiseykerdişê Kalkanî ra tayê noqtayê girîngî wina yê:

‘’Hema zî tecrîdê Îmraliyî dewam keno. Ganî şertê xebate yê azadî seba Rayber Apoyî bêrê caardene. Rayber Apoyî rixmê pêro şertan zî Vengdayîşê Haştîye û Komelê Demokratîkî kerd. Ganî tedeyîya nê vengdayîşî bêra nîqaşkerdene. Ganî çew herinda Rayber Apoyî de qisey nêkero, o bi xo qisey bikero. Rayber Apoyî mesuldarîya xo arde ca. Êyê ke bi qirkerdişê kurdan bawer kenê xelet vejîyayî. Rayber Apoyî ferasetê çinhesibnayîşê kurdan şikna.

Rayber Apo 30 serrî yo seba çareserîye têkoşîn keno. La tena bi ey nêbeno. Seba çareserîye ganî her kes mesuldarîya xo bîyaro ca. Bi taybetî ganî cinî, ciwanê kurdî erkanê xo bîyarê ca. 

Vengdayîşê 27ê Sibate vengdayîşêko tarîxî û manadar bi. Rayber Apoyî çîyo ke her kes nêeşkeno kerd. Nê vengdayîşî erk û mesuldarîyî dayî her kesî. Yanî her kes muxatabê nê vengdayîşî yo.

Ma sey partîye verê cû zî vatibi ke tena Rayber Apo eşkeno kongreya PKKyî bîyaro pêser. Vajîyeno ke ‘Wa kongre PKKyî fesh bikera’ la tena Rayber Apo eşkeno bi kongre na bire bido girewtene. Rayber Apo qerardar o, ma zî hetê ey de yê. La nika çew nêeşkeno Rayber Apoyî bivîno. Eke no sîstemê Îmraliyî dewam bikero kongre do nêra pêser. Dewlete û îqtîdarî no sîstem awan kerd coka ê eşkenê ey wedarnê zî. 

Heyetê Îmraliyî yê DEM Partî Erdoganî reyde zî pêvînayîş kerd. Nê pêvînayîşî de zî çîyê girîngî ameyî qiseykerdene. Derheqê prosesî de eşkerayîyê pozîtîfî dîyenê la ganî gamê pratîkî bierzîyê û seba ke proses bibo çareserîye her kes mesuldarîye bigêro. Wa kurdî naye bizanê ke beno ke peyê nê qiseyan ra pratîkê şerê taybetî zî vejîyo. 

Wa her kes bi baldarî têbigêro. Çunke şer, hêrişî hema zî dewam kenê. Her roje qasê 500-1000 bombardumanî yenê kerdene. Şehîdê ma est ê. Xora xoverdayîşê gerîlayan zî dewam keno. La dewlete hetêkî ra vana ‘wa PKK çekan war verdo’ hetê bînî ra zî nê hêrişan kena. Hêzê ma pozîsyonê adirbirnayîşî de yê. La dewlete hêrişan rê dewam kena. 

Îqtîdar tena cepheyê leşkerîye de ney cepheyê sîyasetî de zî hêrişanê xo domîneno. Hema zî dişmenîya vera kurdan dewam kena. Zîndanî dekerde yê. Îqtîdar huqûq, mehkemeyan, waranê sîyasetî sey çeka xo xebitneno. Bi nê nêzdîbîyayîşî demokrasî do nêro caardene. Hetê bînî ra dewlete hema zî bi qiseyê ‘terorê PKKyî’ têgêrena. Bi nê ferasetî çîyêk do nêvurîyo. 

Tayê partîyê muxalefetî zî dişmenê Rayber Apoyî, PKKyî û kurdan ê. Ameyoxê welatî felan zî eynê înan de nîyo, tena menfaetanê xo fikirîyenê. Eke nê raşta zî demokrasî seba her kesî wazenê ganî paştî bidê çareserîya meseleya kurdan.

Eke meseleya kurdan bêra çareserkerdene Tirkîya do demokratîk biba û pêro herême û dinya de biba mîsala demokrasîyî. Biewnê nika Rojhelatê Mîyanênî de sîstem û îdareyê ke kurdan çin hesibnenê yew bi yew rijîyenê. Kurdî eke bi yewîya xo têbigêrê nê prosesî de do qezenç bikerê.

Qiseyê sey ‘PKK bin kewt, teslîm bi…’ xelet ê. PKK xo fesh bikero la demokrasî nêro caardene rêxistinê ke PKKyî ra hîna radîkal ê, do vejîyê werte. Coka wa çew xîret nêkero ke ma, kurdan û PKKyî bixapîno.

Nê prosesî de ganî hêzê sosyalîst û demokratîkî pîya têkoşîn bikerê û serkêşîya komelî bikerê. Komelê kurdan zî ganî baldar bibo. Rayber Apoyî pêvînayîşê xo yê keyeyî de vato ‘xo rêxistin bikerê.’ Cinî û ciwanî ganî ney ser o xo rêxistin bikerê. Ganî her kes mîyanê çalakîyan de cabigêrê. ‘’