Serekê Pêroyî yê Komeleya Kulturî ya Pîr Sultan Abdalî (PSAKD) Ganî Kaplanî Deklarasyonê Vengdayîşê Demokrasî, Edalet û Haştîye yê HDPyî ANFyî rê ercna.

Kaplanî ard ziwan ke Tirkîya teberê îtîfaqê Cumhur û Mîletî de rayîro hîrêyin esto û vat: ''Goreyê ewnîyayîşê ci yê dinya û mîsyonê ci yê tarîxî mumkun nîyo ke elewîyî mîyanê Îtîfaqê Cumhurî de ca bîgirê. Coka înan zafêr paştî daye Îtîfaqê Mîletî. Elewîyan rey dayî CHPyî ke pabesteyê Îtîfaqê Mîletî yo. Elewî çirey rey  partîyanê sey MHPyî nêdanê. Dewlete na partîye kerde cîya û wird îtîfaqan de zî ca kerde ke înan binê kontrolî de tepişo. Partîyanê Îtîfaqê Mîletî ra yew zî Partîya Saadetî ya ke mumkun nîyo ke elewîyî kişta na partîye de vinderê. Kenê Tirkîya nê wird îtîfaqan rê mecbur bikerî la rayîro hîrêyin zî esto. Partîyê ke haştîye, azadîye û demokrasî wazenê  û rêxistinê demokratîkî eşkenê serkêşîya HDPyî de îfaqê bînî ronê. Tîya wezîfeyo pîl ê HDPyî yo. HDP partîya mifte ya. Wird îtîfaqî zî hewceyê HDPyî yê.''

Kaplanî ard ziwan ke elewîyî nê wird îtîfaqan zî nê wazenî û wina dewam kerd: ''Elewîyî gama ke dare birnenê zî dare ra ozrê xo wazenê û gulbagn wanenê. Heta ke mecbur nêbê seydbaynîye nêkenê. Elewîyî kişta mazlûman de yê. Înanê ke eşt Madimakî ser ewro Tirkîya girewta binê kontrolê xo. Paştgêrê Qirkerdişê Madimakî ewro îktîdar de yê. Coka elewîyî çirey rey nêdanê nê îtîfaqî. Îtîfaqo bînî zî miletperwer o. Elewîyî miletperwerîye sey nêweşîye vînenê coka mumkun nîyo ke paştî bidê partîyêka nîjadpereste.''

Ganî Kaplanî vist vîrî ke heta haştîye çînêbo kiymetê bawerî û nasnameyî çîn o û wina vat: ''Ma tim vanê ke meseleya kurdî ganî pê rayîranê demokratîkan bêro çareserkerdene. Ma na mesele nê sey HDP ne sey dewlete genê dest. Elewîyî çareserîya hetê mazlûman wazenê. Rixmo ke nîmeyê kadroyanê HDPyî zîndan de yo, polîtîka aferneno û rojedemê Tirkîya bewlî keno. Deklarasyonê ci yê 11 madeyan dewan de zî yeno qiseykerdene. No semedê ma erjaye yo. HDP binê zextî de yo la rixmê nayî semedê şaran têkoşîn keno. Waştiş û meseleyê kurdan bewlî yê. Ma sey elewîyî wazenê ke ma xo Qanûnê Bingeyênî de bivînê. Nika semedê elewîyan madeyî tede estê la têna nuşteyê nînê caardene.''

Serekê Pêroyî yê PSAKDyî Ganî Kaplanî ard ziwan ke kombîyayîşê dezgehanê elewîyan û hemserekanê HDPyî zaf rind ravêrt û vat: ''Ma deklerasyonê HDPyî zaf erjaye vînenê. Ma çim qefilnayene morê xo danê binê nê 11 madeyanê deklarasyonî ro. Semedê çareserkerdişê meseleya kurdî û meseleyanê elewîyan no deklarasyon muhîm o. HDP tim meclîs de zî meseleyanê elewîyan ano ziwan. No semedê komelê elewîyan biqîymet o.''