Hemserekê Komeleya Elewîyan a Demokratîke ya Şaxa Anqara Mustafa Karabudakî derheqê nîşankerdişê keyeyanê elewîyan û tedayanê vera elewîyan de ANF reyde qisey kerd.

Karabudakî îfade kerd ke Kerbela ra heta ewro qirkerdişê elewîyan ame kerdene û vat: "Pêro qirkerdişê ke ameyî kerdene qirkerdişê kulturî yê. Sêwas, Çorum, Meletî û Gumgum. eke ma biewnê nê qirkerdişan ma vînenê ke mesele têna qirkerdişê elewîyan nîya. Mesele înan qelskerdiş, ekonomîyê înan rijnayîş û înan koçkerdiş a.

Çiyo ke elewîyan dewan de nêkerdêne şaristanan de kenê. Cenazeyanê xo camîyan ra kenê ra, mewlûdan danê wendene. Nê netîceyê polîtîkayê qirkerdişî yê. Elewîyî ameyî sunnîkerdene. Çîyo ke Îzmîr de ame kerdene, çîyêko newe yan zî verêne nêbi. Dewlete eşkerayîyanê pûçan dana vana domanan, serxweşan kerd."

"12ê êlule ra nata dersê dînî bi zorî yenê dayene, no zî polîtîkaya asîmîlasyonî ya. 2015 ra nata elewîyan paştî danê HDPyî. No zî dewlete ecîz keno. Komêka elewîyan esta ke muxalîf a û vo ver dana. No zî sîstem ecîz keno.

Bawerîya ma zaf qedîm a. Coka elewîtîye bi polîtîkaya asîmîlasyonî nêna çinkerdene. Ma sey komêka elewîyan a muxalîfe  bi rayîrê komeleyan ameyî têhet û nêrazîbîyayîşê xo mojnenê. Nê hêrişî reyna do bêrê kerdene. Ganî ma wayîrê yewbînan û bawerîya yewbînan bivejîyê. Ganî ma bibê Xizirê yewbînan."