Hemserekê KNKyî Ahmet Karamusî hêrişê dewleta tirke ya îşxalkere û cerganê ci û hêrişê qirkerdişî yê vera kurdan ANFyî rê ercnayî.

Karamusî da zanayene ke îşxalê Heleb û Şehba rew ra ameyo plankerdene û vat: ''Zemînê ney bi rewşanê Sûrîye ame amadekerdene. Şerê Îsraîl-Hamasî, alozîya mabênê Îsraîl û Îranî kaos û nakokîye afernayî. Nê pêkewtişan hemsengîyê Rojhelatê Mîyanênî vurnayî.

Dewleta tirke Heleb û Şehba tim tehdît kerdêne. Hêrişê HTŞyî bi koordînasyonê dewleta tirke yenê kerdene. HTŞyo ke lîsteya terorî de yo û hetê Tirkîya ra zî sey terorîstî şinasîyeno. La rixmê ney zî Tirkîya tim paştî dana ci. Dewleta tirke pêro herêmê kurdan xo rê kerdî hedef, HTŞyî de hemkarîye kena û Minbic zî hedefê ci de yo.

Aktorê mîyanneteweyîyî yê sey Îngilîstan, Amerîka û Koalîsyonê Mîyanneteweyî zî verê hêrişan de bêveng ê. No zî firsend dano dewleta tirke.

Îşxalê Heleb û Şehba bîyî sebebê pêlê diyînî yê koçberîye. Dewleta tirke kena ke demografîya herême bivurna. No zî sûcê vera merdimatîye yo û polîtîkayêka qirkerdişî ya.

Xora hêzê kurdan vera îşxalî xoverdayîşêkê qerardarî kenê la no xoverdayîş do bibo prosesêko derg. Kurdî ganî vera hêrişanê dewleta tirke warê sîyasî, dîplomatîk û leşkerîyî de xo ver bidê. Nê prosesî de bêvengîya warê mîyanneteweyîyî xeyalî şiknayî. Ganî xoverdayîşê kurdan zî xurtî bêro eşnawitene.

Dewleta tirke estbîyayîşê kurdan xo rê sey tehdîtî vînena û armanc kena ke pêro destkewte, statu û îmkananê kurdan çin bikera. Nê yewîya kurdan rê zî do tesîr bikerê. Dewleta tirke wazena ke Rojawanî zî Başûrî zî îşxal bikera. Coka dewleta tirke cîhadîst û komê terorîstî organîze kerdî. Armancê Tirkîya net o; qirkerdişê kurdan û nê erdî ra pakîkerdişê kurdan. 

Tayê hêzê kurdan heyf ke îşxalkeran de têgêrenê. ENKS û îstîxbaratê Tirkîya Hewlêrî de hewteyêkî ver kombîyayîş kerd. Ma rojanê verê ma de do bivînê ke helê nê hêzê kurdan çendek parçeyê îşxalî yê. Heyf ke yeno vatene ke Pêşmergeyê Roje yê PDKyî îşxalkeran de têgêrenê. Destkewte û statuyê kurdn binê rîskî de yê. Coka wa pêro hêzê kurdî goreyê na rewşe têbigêrê.

Wa her kes seba pawitişê destkewte û heqanê kurdan têbigêro, yewîya neteweyîye xurtêr bikero û xoverdayîşî rê destek bido. No erko verên o. 

Bi se hezaran kesan koçê herêmanê Îdareyê Xoserî kerdo. Ganî nînan rê paştî, hetkarî û destekî bêrê dayene. No erkê ma yo pêroyînan o. Ma Ewropa de masaya krîzî awan kerde. Ganî ma bi ruhê yewîye û paştdayîşî têbigêrê. Bara koçberan ganî milê ma de biba. Ez venga pêro şarê ma dana ke nê wextanê zehmetan de paştdayîşî xurtêr bikero.

Pêro şrê kurdî prosesêkê tarîxî ra derbaz beno. Ma mejbûr ê ke xo ver bidê. Xoverdayîş seba ma tercîh nîyo. Ma eşkenê bi yewîya xo pêro hêrişan berteref bikerê. Raştîya na ya; dewleta tirke û cergê ci seba qirkerdişê kurdan hêriş kenê. Eke ma yewîya xo ya neteweyîye nêra caardene do dejêkê bînî biancê.

Coka ganî ma bi yewîye têbigêrê. Êyê ke dewleta tirke û cerganê ci de têgêrenê xayînîye kenê. Nê xayînî do nêrê vîrakerdene. Ma venga pêro şarê kurdî, partîyanê kurdan û rêxistinanê kurdan danê ke vengê xo berz bikerê. Pawitişê şarê ma meseleyêka rûmetî ya û erkê her kesî ya. Wext wextê têgêrayîş, wayîrvejîyayîşê şarê ma û xoverdayîşî yo.''