Endamê Konseya Rayberdişî ya KCKyî Mustafa Karasuyî tewrê bernameyê taybetî yê Medya Haber Tvyî bi rojdem ercna. 

Qiseykerdişê Karasuyî ra beşêk wina yo:

''Dewleta tirke wazena kurdan qir bikera. Coka tecrîdê Îmraliyî şexsê Rayber Apoyî de qirkerdişê kurdan o. Têkoşînê vera tecrîdî ganî têkoşînê vera dewlete bêro dîyene. Xora vera tecrîdî asta mîyanneteweyî de çalakîyî yenê kerdene, Erdogan û CPT yenê rexnekerdene. Herêmanê Pawitişî yê Medya de polîtîkayêka hîra ya qirkerdişî yena caardene. Vera ney ganî şarê kurdî, ciwan û cinîyî gerîlayan reyde bibê yew, hêz bidê têkoşînê koyan. Ganî têkoşînê vera tecrîdî zî wina bo. 22 serrî yo şarê ma wayîrê Rayberîye vejîyeno, naye ra pey zî do bivejîyo. La ganî no wayîrvejîyayîş pê çalakîyanê hîna xurtan bêro kerdene.

Herêmanê Pawitişî yê Medya de xoverdayîşêko bêhempa yeno kerdene. Armancê îşxalkeran tasfîyekerdişê têgêrayîşê azadîye yo.Gerîlayî vera teknîk, îmkanan û teknolojîya dişmenî, bi hawayêkê fedayî xo ver danê, şer kenê. 2 mengî yo dewleta tirke ameye tengkerdene. Kurdayetîye pê wayîrvejîyayîşê gerîlayan bena, wezîfeyo verên no yo. No xoverdayîşê gerîlayan do ameyoxê ma eşkera bikero. Ma deyndarê nê ewladanê xo yê. Ma pê berzkerdişê têkoşînî ganî nê deynî bidê.

Yew eleqeyê nêzdîbîyayîşê PDKyî pê kurdayetîye çin o, PDK xizmetê dewleta tirke keno. Dewleta tirke çim verdayo Başûr, vana Mûsil û Kerkûk ê min ê. Nê wextî de ke artêşa tirke teng bîye PDK resa hewarê ci. PDK pê ablûqaya gerîlayan wazeno bibo sîndan. Dewleta tirke zî çakûç a. Na têkilîya PDK û dewleta tirke nêna qebulkerdene. Rayaumûmî, hêzanê sîyasîyanê Başûrî pê eşkerayîyan vera nê tewirê PDKyî nêrazîbîyayîşê xo mojna. PDK bi nê hawayî ameyoxê Başûrî zî visneno binê tehlukeyî. Dewleta tirke key PKK biqedîna PDK zî qedînena. La PDK ho hêrişanê dewleta tirke meşrû keno. Ganî şarê kurdî ney bivîno. Ma pê hêvîdar ê ke PDK nê kerdişan ra fek vera bido.

Şertê partbîyayîşê kurdan no yo ke ganî goş bido kurdan. Şarê Başûrî wazeno ke PDK gerîlayan reyde şer nêkero. La PDK hêzanê xo beno Şêladizê û Çemço. Na bira şerî ya. Dekewtişê nê herêman yeno manaya dormegirewtişê Avaşîn, Zapî. Wa şarê kurdî bizano ke derbazbîyayîşê Çemço, Sîda û sewqîyatê leşkerî yê ver bi Metîna do netîceyanê giranan bidê.  Xora înan waşt Metîna de şer bivejê la gerîlayî bi hawayêkê hîsgerî nêzdîyê mesele bîyî. La eke ver bi Sîda û Çemço game bêra eştene şer do biqewimîyo. PDK vano qey eke dewleta tirke PKKyî tasfîye bikero o do pêro Kurdîstan de bibo serdest. Nika no tewirêko welatperwer o? Wa kurdî vera ney bêveng nêmanê. Beno ke zerar bireso ma la a raşte şerê zereyî de PDK do bin bikewo. PDK goreyê 40-50 serrî verî têgêreno la kurdî û Kurdîstan vurîyayî. Ewro raştîya Rayberîye esta ke pêro dinya rê tesîr kena. PDK fikrê şarî, nêzdîbîyayîşê şarî û hîsanê şarî peygoş keno. Ma venga şarê kurdî û dostanê kurdan danê ke têkoşînê vera îşxalê dewleta tirke pîl bikerê, seba ke PDK şaşîya xo ra abigêro tewirê xo bi zelalî bimojnê.

Hêrişê vera HDPyî parçeyê polîtîkayan xeniqnayîşê demokrasî û tasfîyekerdişê Têgêrayîşê Azadîye yê Kurdîstanî yo. Semedo ke îqtîdar ho rijîyeno wazeno HDPyî biqefilno. Ê hende qels nêbîyêne nêwaştêne HDP biqefilnê. La qefilnayîşê HDPyî zî do înan nêxelisno. Herinda ke merdimî pê qefilnayîşê HDPyî qerqilîyenê ganî têkoşîn berz bikerê û îqtîdarî çin bikerê. Îqtîdar zaf qels bîyo. Têna tay hêzî paştî dano ci. Yew meşrûtîyetê ci çin o. Na dewlete vurîyaya dewleta çete û mafyayan. Eke hêzê demokrasî û kurdî bibê yew na dewlete rijîyena. Beno ke HDP bêro qefilnayene; çunke welat de huqûq û edalet nêmendê. Erdogan zî hende qels bîyo ke Tirkîya roşeno, her ca de beno leşkerê yewna dewlete. Rijîyayîşê nê îqtîdarî nêzdî yo. Ma venga kurdan, hêzanê demokrasî danê ke bi çêrî têbigêrê, têkoşîn bikerê, çêrîya kurdan koyan de bivînê. Wa bivînê kênayê kurdî senî şer kenê û nînan ra çêrîye bigêrê. Eke kurdî, şarê Tirkîya û hêzê demokrasî bi coş û moralî têkoşîn bikerê îqtîdarê AKP-MHP mengêke zî nêeşkeno bimano.''