Serekê Şubeyê Wanî yê Komeleya Heqanê Merdiman (ÎHD) Mehmet Karataşî ANFyî rê qisey kerd.

Karataşî da zanayene ke Zîndanê Îmraliyî de pêro heqê Rayberê Şarê Kurdî Abdullah Ocalanî yenê binpaykerdene û vat: ''Tecrîd sûcê merdimîye yo. Tecrîd û qedexeyê pêvînayîşan ê vera Ocalanî qanûnî nîyê. No tecrîd mojneno ke Tirkîya qanûnanê xo zî binpay kena. Tecrîdê vera Ocalanî verê çareserîya meseleya kurdan de astengîya tewr pîlêr a. Tecrîdê Îmraliyî vilayê pêro zîndanan bîyo.''

Hemserekê Şubeyê Wanî yê Egitim-Senî Murat Atabeyî zî ard ziwan ke tecrîd binpaykerdişê Qanûnê Bingeyî û huqûqê mîyanneteweyî yo û vat: ''Rêxistinê pîlî yê demokratîkî ganî mesuldarîyanê xo bîyarê ca. Seba polîtîkayanê şerî û neçareserkerdişê meseleya kurdan polîtîkaya tecrîdî yena caardene. Seba qedînayîşê şerî û awankerdişê haştîye ganî verî tecrîd bêro wedaritene.''