Fermandarê Qerargahê Merkezê Pawitişê Şarî (MPŞ) Murat Karayilanî şerê topyekunî yo ke dewleta tirke 9 serrî yo bêmabên rayra bena û têkoşînê kurdan ê 9 serran  ke hetê tirkan rê da vatene ke Rayberê Şarê Kurdî ganî meclîs de qisey bikero, rojnameyê Yeni Ozgur Politika rê erjna.

Şerê 9 serran

Qiseykerdişê Karayilanî ra qismêk wina yo:  ''9 serrî yo şero ke Kurdîstan de yeno rayraberdene dahîna xurt o û bi heme îmkananê dewlete yeno kerdene. Îqtîdarê tirkî seba ke warê mîyanneteweyîyî ra semedê şerî paştî bigîro çîyo ke destê ra ame kerd ke ser bikewo. Waştişê ci o bi ke Vakur de PKKyî biqêdîno, Herêmanê Pawitişê Medya de heme merkezanê fermandarîye vila bikero û nê warî çîn bikero, cayanê sey Şingal û Kampa Mexmûrî tesfîye bikero, Îdareyê Xoserî yê Rojawanî tesfîye bikero û ê cayan îşxal bikero.  Dewleta tirke esas de waşt çar parçeyan de têgêrayîşê Apoyî tesfîye bikero û destkewteyanê kurdan binate ra wedaro. 9 serrî yo semedê nê bi heme hêzê xo şerî rayra bena. Îşxalkeran tay waran de 8, tay cayan de 20 kîlometre îşxal kerdî la nê cayan de şer dewam keno. Yanî Metîna, Rojhelatê Zapî  û xeta Xinêre-Xakurkê de gerîlayî est ê.

Ganî ma destê Rayber Apoyî xurt bikerê

Ewro herêma ma Rojhelato Mîyanên gîryeno. Herême de Şerê Dinya yê Hirêyînî  yeno rayraberdene û beno ke girdêr bibo. Hêzê hegemonîkî wazenê bi nê şerî herême newera dîzayn bikerî. Senî ke hetê tehlukeyinî yê nê prosesî est ê, avantaj û firsetê ci zî estê. Ganî ma bi nameyê şaranê herême vera hêzanê ke wazanê herême tarî bikerê, xeta têkoşînî ya demokratîk û şorişgêre aver berê.  Ma hem sey têgêrayîşî hem zî sey şarî ganî raştîya Rayber Apoyî rê dahîna zaf bibê cewab. Wezîfeyê ma yo ke ma barê ci şenik bikerê û destê ci xurt bikerê. Eke ma na babete de ser bikewê, ma eşkenê qewimîyayîşanê herême û welatî rê zî bibê cewab.

Ma vera çareserîya demokratîke nîyê

Îqtîdarê AKP-MHPyî dewrê peyênî de tay muneqeşeyî kerdî rojdem. Senî ke prosesêko newe est o xo bi xo meneqeşe kenê la ma rê, hetê kurdan rê hema çîyêk nêvato. Ma sey têgêrayîşî vera prosesê çareserîye yê demokratîkî nîyê.  Ma hende tecrubeyan ra dima rayîr nêdanê taktîkanê şerê taybetî. Xora şertî bedilîyayî, çîyêkî hêver  bîyî reyna nêbenê. No raşt o. Hêver giranî û samîmîyet çîn bi.  Dewleta tirke hetêkî ra Rayberîya ma reyde pêvînayîşî kerdêne, hetê bînî ra bi Planê Çokdayîşî hazirîya şerî kerdêne.  Tayip Erdoganî mutabakatê Dolmabahçe înkar û red kerd û şer û tecrîd fînayî dewre. Inkey zî hem senî ke çîyo newe est o qale kenê, hetê bînî ra tehdît kenê, çuye ramojnenê. Ma têkoşînê xo rayra benê, hewceyê çewî nîyê.

Wa çew hesabo xelet mekero

Reyna vatişê sey 'ma PKK zereyê sînoranê xo de kerd zehîf, heta qedîna. Têna Iraq û Surîye de est o' ke tay muneqeşeyan de yeno vatene, raşt nîyo. Ma sey stratejî Vakurê Kurdîstanî de bi hewayêkê zanayeyî biney sist nizdî benê. Ê ke nê sey zehîfîye vînenî, siba do bivînê ke senî gird xeletîyayî.  Ma ewro 10 serrî hêverî ra dahîna hêzdar ê.  Beno ke ma Vakur de gerîlayî biney bîyî tay la wa çew xo mexapîno. Potansîyelê ma gird o. Dewleta tirke 4-5 serrî yo vana ma Vakur de qêdînay; na zûra gird a. Teberê yew di eyaletan ke tede binge çîn o, her ca de hêzê ma mewzîyanê xo pawenê. Nê semedî ra wa çew hesabo xelat mekero.

Ganî taktîkan ra dûrî bêro vindertene

Eke semedê çareserîye gamî yenê eştene ma sey hetê kurdan naye rê nêvanê ney. La wa her kes bizano ke cehdkerdişê çareserîye ke tede waştişê azadîya Rayber Apoyî çîn a, ma qebul nêkenê. Çarçewaya qanûnê Mandela de nizdîbîyayîşê Rayber Apoyî û averberdişê dîyalogan eşkeno mesele çareser bikero. Bêşik senî ke Raybe Apoyî zî nîşan da, semedê çareserîye rolê muhîmî yê PKKyî û sîyasetê demokratîkî yê kurdan est ê. Rejîm wazeno ma biverdo pê. Ganî no taktîk bêro caverdayene û rolê ke nê hetî eşkenê kay bikerî înan ser bêro vindetene. Eke wina bikerê, problem nêbeno.  Xora hêver zî dewleta tirke çareserîya meseleya kurdan de Rayber Apo û PKK sey muxatabî qebul kerdbî. Reyna sîyasetê demkratîkî yê fermî rê zî rol fasilna bi. Nêeşkenê nê ra peyser game bierzê û eke no bibo babetê muneqeşeyan, no nîyeto hol nîyo.

Devlet Bahçeli sey muxatabî vîneno

Devlet Bahçelî sey muxatabî veng dano Rayber Apoyî. Eke vengdayîşê xo de samîmî yo, xora hetê kurdan zî game erzeno. La eke seba ke tengayî de yê, bi taktîkan wazenê verê xo abikerê, wa bizanê ke ma hinî taktîkanê înan rê nêxapîyenê. Gerîlayê Azadîye yê Kurdîstanî do rayîr medo taktîkanê şerê taybetî. Gerîlayî bi hewayêkê qerardarî xeta Rayber Apoyî de her wextî ra dahîna zaf do wezîfeyê xo bîyarê ca. Bi tecrubeyê xo dahîna xurt têkoşîn bikerê, şer bikerê û ser bikewê.''