Wekîlê HDPyî û Endamê Komîsyonê Meclîsê Plan û Budçe Erol Katirciogluyî xebatê budçe yê partîya xo ANFyî rê ercnayî.

Katirciogluyî vist vîrî ke tercîhê budçe yê hukmatî tim şerî nîşan kenê û vat: ''Serra 2015î ra nata budçeyan de qelemê tewr pîlî semedê bahaneya asayîşî vera dîyayî û par zî budçe bi heman hawayî ameye dayene şerî. Mi çim de emser zî budçe do bêra dayene şerî. Nêzdîbîyayîşê hukmatî yê ekonomîya welatî nêvurîya. Reyna qala S-400î, F-16î yena kerdene. AKP emser zî budçeya şerî tercîh keno.''

Katirciogluyî îfade kerd ke AKP semedo ke çimeyan biaqilî nêxebitneno ferahîye nêbena û vat: ''Coka şar HDP tercîh keno. Herinda ke budçe asayîşî rê bêra xerckerdene ganî semedê ferahîya komelî û xebatanê haştîye bêra xerckerdene. Budçe key bêra Komîsyonê Plan û Bedçe ma do muxalefetêkê tûjî bikerê.''