Sîyasetmedaro kurd Fuat Kav ke Zîndanê Dîyarbekîrî de mend ANFyî rê qala manîfestoya xoverdayîşî ya şorişgêranê PKKyî ya vera konseptê îmhayî kerd. Qiseykerdişê Kavî ra qismêk wina yo:

''Zîndanê Dîyarbekîrî de vera netewêke, vera şarêkî weheşet ame kerdene. Vera tepişteyan ê kurdan, kadroyanê serkêşan ê PKKyî îşkence ame kerdene. Kesê ke ûca raştê îşkenceyî ameyênî semedê  xelisnayîşê Kurdîstanî û azadîya şarê kurdî ûca de bê. Zîndanê Amedî de şexsê tepişteyan de ame waştene ke îradeyê kurdan bêro şiknayene. Sey Hitlerî înan zî waşt kurdan çîn bikerî. Afirnayoxanê rejîmê 12ê Êlule  semedê teslîmgirewtişê Zîndanê Amedî projeyî, konseptî hazir kerdbî.  Waştişê înan teslîmgirewtişê tepişteyan bi. Waştişê tepişteyan zî xoverdayîş û serkewtiş bi. Tepişteyan PKK, netewa kurdan û şarê kurdî pawetêne.

Îşkenceyo ke tepişteyan rê nêame kerdene nêmend la rixmê heme îşkenceyan tepişteyan xover da. Îşkenceyo tewr pîl qexekerdişê kurdkî bi. Ma nêeşkayêne merdimanê xo reyde kurdkî qisey bikerê û medimanê ma zî tirkî nêzanayêne. Eke vera nê kerdişan çîyêk nêameyêne kerdene ûca qirkerdişêk ameyêne kerdene.Coka embaz Mazlûm Doganî bi çalakîya xo vat hinî bes o û xerîtaya rayîrî zelal vet werte. Embazanê bînan zî nê rayîrî de xoverdayîşê xo domna. Çalakîya Mazlûm Doganî cîya bî, çalakîyanê çaran cîya bî û çalakîya 14ê Temmuze cîya bî. Nê çalakîyî pêro pabesteyê yewbînan bî, yewbînî kerdî tememam la sey yewbînan nêbî.''