Walîyê Qersî Turker Oksuzo ke Şaredarîya Qersî ke ameye xespkerdene de sey qeyûmî ame cakerdene, verê şaredarî de nimaj kerd. Hemvervatoxa Kongreya Îslamê Demokratîkî (DÎK) Huda Kaya vera naye nêrazîbîyayîş ramojna.

Kaya bi eşkerayîyêka nuştekîye nê pare kerdî: ''Her muslumano ke bawerîya ci ya Hûmayî esta, rayîrê paygamberan de aver şino û Qûranî xo rê sey kitab û hemrayî vîneno zano û do ganî bizano ke zure, dizdîye, xesp û îşkence sûc û gune yo. Kesê ke bi îradeyê şarê bajarêkî ameyî vîjnayene bi zuran destbend kenê, tepişenê û îradeyê bajar û şarî xesp kenê û dima  seba kerdişanê xo bikerê meşru bi nimaj û Hûmayî şarî xapînenê.

Êyê ke çîyê ke xo rê sey heq vînenê yê bînan rê nêwazenê û destê înan ra genê ne verê şarî de ne zî verê heqî  bi nimajî nînê pakerdene. Yezîd û leşkeranê ey ke Hz. Huseyîn qetil kerd, înan zî nimaj kerdêne. Înanê ke Ebu Hanife û Ahmet bîn Hanbelî zîndanan de bi îşkenceyan qetil kerdî, zî nimaj kerdêne la ewro tarîx înan bi lanetî ano vîrî.

Yew îqtîdaro ke dizdîye û bêedaletîye keno, zure vano, îşkence keno ke payra bimano qet yew nimaj ey nêxelisneno. Nimaj estuna dîn, heqîqet û edaletî ya, yê îqtîdarî ke merdiman bi Hûmayî xapîneno û zulm  keno, nîyo. ''