HDPyîjanê ke waşt Meydanê Şîrînevlerî de hêrişê vera banê Bahçelîevlerî protesto bikerê raştê hêrişê polîsan ameyî.

Verê eşkerayîye polîsan banê HDPyî yê qeza girewt binê ablûqa. Wekîlê HDPyî Huda Kaya, Zuleyha Gulum, Hemserekê Rêxistina HDPyî ya Îstanbulî Ferhat Encu tewrê çalakîye bîyî. Polîsan waşt çalakîye asteng bikerê. Şarî bi sloganan caardişo keyfî şermezar kerd, ablûqa şikit û ver bi banê Bahçelîevlerî kewt rayîr. Polîsan hêriş kerd û xeylêk kesî destbend kerdî. Rixmê heme hêriş û astegkerdişê polîsan HDPyîjan verê banê qeza eşkerayîye daye.

Tîya verî Ferhat Encuyî qisey kerd vera hêrişan nêrazîbîyayîş mojna û vat bi zext şima nêeşkenê verê HDPyî bigêrê.

Huda Kaya zî hêrişê polîsan şermezar kerd û wina veng ked Wezîrê Karanê Teberî Soyluyî: ''Mermûrê asayîşê ke bi keda şarî maaşan genê, êyê ke wazenê vengê ma bibirnê û ma heps bikerê rê ez wina vana;  AKPyî mîladê xo kerd de, qedîya. Mevajê qey salatanato ke şima paştîya xo daya ci bimano. Ma do hemeyan bişawê. Heme do bêrê muhakemekerdene. Sibayê ewroyî esto û dişa do ê sibayan de çînê bê.''

Kaya seba ke alîmê DİYADERî sey hedefî yenê ramojnayene hersê xo ard ziwan û vat: ''Seba ke hutbeyo kurdkî wendo alîmê dînî yenê muhakemekerdene, hepskerdene. Ziwanê hûmayî têna tirkî yo, cahîlî,nêzanî zalîmî? Êyê ke xo rê vanê dîndar şima qet qûran nêwend. Heme dînî û rengî ayetê hûmayî yê. Şima nêeşkenê yew ziwanî qedexe bikerî û ê bînî rê mecbur bikerî. No vera kitabê hûmayî şer o. AKP tam zî naye kena. No saltanato ke vera bawerîyan, merdiman, azadîyan, kede, edalet xîyaneto pîl keno ma do peynîya ci bîyarê. Nêşarmîyenî vanê 'hûma ma rê nînan dano kerdene.' Bêşerm û bêehleqan. Ma do qet yew qirkerdişî xo vîr a nêkerê û sey cinîyan qesasê ci bigêrê.''