Dêra Notre Dame ya şaristanê Nice ya Fransa de cîhadîstan hêrişêk kerdbi. Netîceya hêrişî de 3 kesî bi hawayêkê barbarî kişîyayî. Dîwanê Hemserekîye yê Kongreya Komelê Demokratîkî ya Kurdîstanijan a Ewropa (KCDK-E) derheqê hêrişî de eşkerayîyêke daye.

KCDK-E îfade kerd ke Serekkomarê Tirkîya Recep Tayyîp Erdogan û cerganê ci xeylêk şaristananê Ewropa de bi çalakîyanê terorî merdimê bêguneyî kiştî. KCDK-E pare kerd ke Erdogan wazeno mîyanê welatan de tersêk biaferno, bi çalakîyanê terorî Ewropa rê şantaj bikero û bi nê hawayî îşxalê xo rê zemînêkê qanûnîyî amade bikero.

KCDK-E vist vîrî ke înan Ewropa derheqê tehlukeyanê Erdoganî de zaf reyan hîşyar kerdî. KCDK-E bale ante hêrişanê Lyon, Nice, kişîyayîşê mamostayê tarîxî ser û vat ke fermanê nê hêrişan hetê Erdoganî ra dîyayî û planê nê hêriş û çalakîyanê nîjadperestan sersefîrî û dezgehanê tirkan de ameyî kerdene.

Eşkerayîye wina dewam kena: ''Ganî Erdogan warê mîyanneteweyî de bêro hukmkerdene. Ganî welatê Ewropa têbigêrê û Erdogano ke Hîtlerê seserra 21. yo vindarnê. Ma venga merdimîye, şaranê Ewropa, dewletanê Ewropa danê ke Erdogano terorîst vindarnê. Ma keyeyanê qurbanan rê serweşîye wazenê û birîndaran rê zî şîfa wazenê.''

Hetê bînî ra Komelê Demokratîkî yê Kurdan ê Fransa (CDK-F) zî hêrişê Nice şermezar kerd û keyeyan rê serweşîye waşt. CDK-Fyî netîceya hedefmojnayîşê Erdoganî de no hêriş ame kerdene û vat: ''Vera terorîzmê cîhadîstî û faşîzmî ma bibê yew.''