Înîsîyatîfê Ocalanî rê Azadîye çarçewa Hemleya 'Wextê Azadîye' de bi şîarê 'Azadîye do ser bikewa, seba Ocalanî têbigêrê' şaristanê Strasbourgî yê Fransa de verê Konseya Ewropa (KE) de dest pê çalakîye kerdbî. Çalakîye kewte roja 3. 

KCDK-E bi eşkerayîyêke venga pêro dezgehanê Ewropa, zerrîwazanê azadîye û demokrasî da ke tewrê çalakîye bibê. KCDK-E da zanayene ke çalakîye seba azadîya Rayberê Şarê Kurdî 1-17ê kanûne de mabênê saete 10.00-15.00 de do bêra kerdene.

KCDK-E pare kerd ke her roje merkezê komelanê demokratîkan, têgêrayîşê cinî û ciwanan, hemserek, dezgehê bawerîye yê Kurdîstanî, sîyasetmedar, dostê enternasyonalîstî, Yewîya Hêzanê Demokratîka pê ruhê seferberîye tewrê çalakîye benê.

KCDK-E vat: ''Ma venga şarê xo, dostanê xo, pêro zerrîwazanê azadîye û têdûştîye danê ke tewrê çalakîya Strasbourgî ya Konseya Ewropa bibê seba azadîya Rayberê Şarê Kurdî Abdullah Ocalanî yena kerdene û 1ê kanûne de dest pêkerd û heta 17ê kanûne do dewam bikera.''