Dîwanê Hemserekîye yê KCDK-E semedê 'Şayîya Kulturê Kurdan' eşkerayîye daye ke şayîye emser Hollanda de do bêra kerdene. KCDK-E venga her kesî da ke goreyê qaîdeyan têbigêro.

Şayîya Kulturê Kurdan a 29. 25ê êlule de şaristanê Landgraafî yê Hollanda de do bêra kerdene.

KCDK-E eşkerayîya xo de vat: ''Şayîye pê bernameyê xo yê zengînî, pê qiseykerdişan û çalakîyan bi şîarê azadîya Rayberîye do dest pêbikera û biqeda. Na şayîye dîyarîya Sînan Dêrsimî ameye kerdene. Şarê kurdî û dostê ci ganî pê dîsîplîn û coşêkî, pê moralê waştişê azadîya Rayber Apoyî tewrê şayîye bibê.

Şayîye de ganî merdimî goreyê nê qaîdeyan têbigêrê:

-Kesê ke derzîne bîyê ganî dokumentê derzîne bîyarê, kesê ke derzîne nêbîyê dokumentê netîceya testê Korona bîyarê. Kesê ke nê warî de raştê astengîyan yenê warê şayîye de eşkenê test bikerê.

-Ganî hacetê tûjî nêkewê warê şayîyei wa her kes goreyê tedbîranê asayîşî têbigêro.

-Warê trafîkî, vejîyayîş-dekewtişê warî, vindarnayîşê beran û prosesê kontrolî de ganî beşdarî goreyê tedbîran têbigêrê.

-Semedo ke şayîye weş bivîyara  ganî her kes bi mesuldarî têbigêro.''