KCDK-E: Vera çekanê kîmyewîyan tewrê çalakîya Den Haagî bibê
KCDK-E semedo ke OPCW heyetêk bişawo cayanê hêrişanê kîmyewîyan 3ê teşrîna peyêne de verê bînaya OPCWyî yê Den Haagî de kom bibê. KCDK-E venga pêro kurdan da ke tewrê çalakîyan bibê.
Kongreya Komelê Demokratîkî ya Kurdîstanijan a Ewropa (KCDK-E) bi eşkerayîyêke venga Rêxistina Qedexekerdişê Çekanê Kîmyewîyan (OPCW) da.
KCDK-E vist vîrî ke artêşa tirke ya îşxalkere 23ê nîsane ra nata hêrişê Başûrê Kurdîstanî kena, hêrişan de çeka kînyewîye xebitnena, herêmanê sivîlan dana bombayan ver.
KCDK-E vat: ''Rixmê gende dokumentan, gerreyan û agahîyan Neteweyê Yewbîyayeyî, Yewîya Ewropa, Konseya Ewropa û OPCWyî çîyêk nêkenê. Cigêrayîşê nê hêrişan erkê OPCWyî yo. Ganî OPCW meverdo ke dewleta tirke çeka kîmyewîye bişuxilna û sûcanê şerî bikera. Ma wazenê wa OPCW heyetêk bişawo Zap, Metîna û Avaşînî.
Bi na wesîle 3ê teşrîna peyêne de verê bînaya OPCWyî de şaristanê Den Haagî yê Hollanda de ma do çalakîyêke bikerê. Ma venga pêro cinîyan, ciwanan û şarê xo danê ke tewrê çalakîye bibê.''
Çalakîye 3ê teşrîna peyêne de saete 13.00 de verê bînaya Dîwanê Edaletî yê Laheyî de Carnegieplein 2, 2517 KJ Den Haag de pê rayraşîyayîşî dest pêbikera û verê bînaya OPCWyî Johan de Wittlaan 32, 2517 JR, Den Haag de pê nawnayîşî do dewam bikera.
