Hemserekîya Konseya Rayberdişî ya KCKyî derheqê serrgêra 83. ya dardekerdişê Seyîd Riza û embazanê ci de eşkerayîyêke daye û ê yad kerdî.

Eşkerayîya KCKyî wina ya:

''83 serrî verê cû Terteleyê Dêrsimî de doman, cinî, kokim û ciwanî 70 hezar kurdê elewî ameyî qetilkerdene û rayberê komelî Seyîd Riza, lajê ey û rayberê bînî yê Dêrsimî ameyî dardekerdene. Hema zî cayê gorê Seyîd Riza û embazanê ci yenê nimitene. Ma Seyîd Riza, embazanê ci û bi des hezaran kesanê ke ameyî qirkerdene bi mînet û hûrmetî yad kenê. Ma soz danê înan ke ma do Kurdîstanê azadî û Dêrsimê xoserî awan bikerê.

Sebebê Terteleyê Dêrsimî rapor û dokumtanê dewleta tirke de zaf reyan ameyî îsbatkerdene. Dewleta tirke seba ke şarê Dêrsimî terbîye bikera û bikerê tirk no tertele kerd. Terteleyê Dêrsimî qirkerdişo tewr pîl ê seserra 20. o.

Dardekerişê Seyîd Riza û embazanê ci

Dokumantanê dewleta tirke de yeno vatene ke 'Dêrsim de qet yew merdim do nêciwîyo' û dersimijî sey wehşîyan yenê pênasekerdene. Raştîya elewîtî û kurdayetîye ya ke tede erjê merdimîye û hêzê komelkîye pawîyenê, wina ameye îfadekerdene. Qaşo dewleta tirke seba ke dêrsimijî bikera 'merdim' no tertele kerd. Dêrsimijî bi nê hawayî maruzê qirkerdişêkê wehşî û bêrehmî mendî. Şarê Dêrsimî no qirkerdiş xo vîrî ra nêkerd û pê deyîre, kilame û lorîkan neqlê neslan ê neweyan kerd.

Dêrsim û dêrsimijê raştikênî mîyanê nê kilaman û tarîxê fekkî de yê. Arşîvê dewlete zî îsbat kenê keno qirkerdiş senî bêmerdimîye bi. Çend serrî verî Tayyîp Erdoganî seba ke CHP rexne bikero îtîraf kerd ke Dêrsim de sûcê merdimîye yê giranî û qirkerdişî ameyî kerdene. Verî wezîrê karanê teberî yê ê çaxî Sabrî Çagliyangîlî zî îtîraf kerdbi ke dêrsimijî şikefteyan de sey mareyan pê jehrê înan merdî.

Seyîd Riza û embazê ey sey sembol û îsbatê nê terteleyî û çinkerdişê Dêrsimî ameyî dardekerdene. La tornê Seyîd Rizayî vera nê qirkeran çok nanê erdî ro û pê perwerîya rayberan xo tim qirkeran hesab persenê û seba azadîya Dêrsimî têkoşîn kenê.

Pîr Seyîd Rizayî pê vatişê xo yê 'Ez nêeşkaya vera zûr û puşilanê şima şora sere, no mi rê bi derd. La mi zî şima ver de zanî nêna ro, wa no zî  şima rê derd bo.' pêro şarê Kurdîstanî û dêrsimijan rê mojna ke ganî vera dişmenî ma tewirêkê senînî bimojnê.

KCK: Wa Seyîd Riza û embazê ci cayê xo de zerrîrehet bibê! Cinî û camêrdê elewî-sunî yê kurdî vera qirkeran sereyê xo nêanê war. Ê do heta awankerdişê Kurdîstanê azadî û Dêrsimê xoserî têkoşîn bikerê.

Saît Kiziltoprak, Alî Haydar Yildiz, Huseyîn Cevahîr, Suleyman Cîhan, Mazlûm Dogan, Sakîne Cansiz, Hêlîne Murat, Cafer Cangoz û bi hezaran şehîdî rayberîya nê têkoşînê azadîye dewam kenê. Tewir û têkoşînê înan sey ê Seyîd Rizayî dişmenî rê benê derd.

Ê do qetî nêrê vîrakerdene, hasreta înan a Kurdîstan û Dêrsimê azadî do qetî bêra caardene.''