Hemserekîya Konseya Rayberdişî ya KCKyî serrgêra daliqnayîşê înan de Seyîd Riza û 6 hemrayanê ci yad kerdî û dewleta tirka qirkere ya dişmenê kurdan şermezar kerd.

Eşkerayîya KCKyî de nê ameyî vatene: ''Ma şexsê  Rayberê têkoşînê Dêrsimî Pîr Seyîd Riza û serkêşanê têkoşînî Besê, Alîşêr û Zarîfe de reyna kesê ke Terteleyê Dêsrimî ameyî daliqnayene û qetilkerdene yad kenê û dewleta tirke ya qirkere ya dişmenê kurdan bi hêrsî şermezar kenê. Dewleta tirke ya hêrişkarê pê harekatê vera Dêrsimî qirkerdişanê tewr girdan ê tarîxî ra yew qirkerdiş kerd ke no qirkerdiş do çirey vîrê kurdan û şarê Dêrsimî ra mevejîyo. Mumkun nîno ke şarê kurdî qirkerdişanê dewleta tirke xo vîra bikero. Ma sey Têgêrayîşê Azadîye yê Kurdan reyna soz danê ke ma do têkoşînê şarê Kurdîstan û Dêrsimî biresnê serekewtişî û hesabê qirkerdişan bipersê.

Dewleta tirka dişmenê kurdan sey qirkerdişanê bînan Dêrsim de zî rîyê nasnameyê kurdan qirkerdiş kerd. Dêrsim kultur û nasanmeyê kurdan û elewîyan qoq dayo. Coka dewleta tirke semedê nê Dêrsim kerdo hedefê xo û harekatê vera Dêrsimî dayo destpêkerdene. Dewleta tirke qij û cinî nêvatê heme şar qir kerd. Cinîyê diganî ameyî sungukerdene û pîzeyê înan ameyî dirnayene û heme gerguşê ke nêameyî dinya ameyî qetilkerdene.  Nê caardişê teberê merdimîye têna vîrê şarî de nê belgeyanê dewlete û vatişanê qetilkeran de zî est ê.  Nê caardişê teberê merdimîye dewleta tirke pê zîhnîyetê dişmenîya vera kurdan kena. Xora dewleta tirke o wext kerdişê xo yê Dêrsimî nênimitî û sey çîyêkî raşt û serkewteyî mojnayî û wayîrê ci vejîyayî.

Rayberê têkoşînê Dêrsimî Pîr Seyîd Riza seba ke verê qirkerdişî bigêro û mesele çareser bikero waştişê pêvînayîşê selahîyatdaranê dewlete qebul kerd û dima ra pê komployî ame tepiştene û ame daliqnayene. La gama ke Seyîd Riza pê îdamî ma tehdîtkerdene vat 'Ma do verê şima de çok medê' û dersa dewr pîle ya tarîxî daye dişmenê qirkerî . Seyîd Rizayî teslîmîyet qebul nêkerd, têkoşîn esas girewt û bêters şi dişmenî ser. Xora şarê Dêrsimî serkêşîya Seyîd Riza, Besê, Alişêr û Zarîfe  û xeylêk kesanê bînan ê sereyê xo çewt nêkerd de  rumetê şarê Dêrsim û Kurdîstanî pawit.

Dewleta tirke Dêrsim de çekê kîmyewîyî zî şuxulnayî. Kesê ke hêrişê Dêrsimî ra remayî û koyan de xo nimit pê çekanê kîmyewîyan ameyî qetilkerdene. Ewro zî dewlete û artêşa ke pê îtîfaqê faşîstî yê AKP-MHPyî yena îdarekerdene  pê çekanê kîmîyewîyan hêrişê kurdan kena.  Sûcê dewleta tirke newe nîyê. Heta ke na rewşe mero vînayene, qebulkerdene û nê de nêro têrî Tirkîya de bedilnayîş nêbeno. Ganî verî Terteleyê Dêrsimî de bêro têrî. Êyê ke cesaretê înan çîn o raştîya Dêrsim û kurdan de berê têrî ferqê înan û AKP-MHPyî çîn o.

Ma reyna şexsê Seyîd Riza, 6 embazanê ci, Besê, Zarîfe û Alişêrî de êyê ke Terteleyê Dêrsimî de ameyî qirkerdene bihurmet yad kenê. Şarê kurdî heta ewro pê têkoşînî estbîyayîşê xo pawit û ewro ra tepîya zî do bi xoverdayîşî bireso azadîya û dersa bimana bido dewleta tirke ya qirkere.''