Konfederasyonê Sendîkayanê Kedkaranê Umûmîye (KESK) bi şîarê ''ma nêeşkenê debarê xo bikerî'' Amed, Îstanbul û Îzmîr de mîtîngî kerdî. Bi hezaran kedkerê ke vera îqtîarê AKPyî vejîyayî kuçeyan vat hinî bes o.

Amed de bi hezaran kesî rixmê serd û varayîşî Meydanê Îstanyonî de ameyî têhet. Riha, Mêrdîn, Şirnex, Colamêrg, Êlih û Sêrt û bajaran bînan ê dormeyî ra bi seyan kesî pê pankartan sey kortejan kewtê warê mîtîngî. Cinîyî zî bi kortejanê cîyayan û tîlîlî û sloganan tewrê mîtîngî bîyî. Reyna bi sloganan xoverdayîşê zîndanan ame selamkerdene û îqtîdar ame şermezarkerdene. Pîya bi Hemserekanê Pêroyî yê KESKî  Şukrane Kablan Yeşîl û Nasir Demirkiranî xeylêk îdarekarê partîyanê sîyasîyan û rêxistinanê komelî tewrê mîtîngî bîyî. Dayîke Haştîye zî bi kincanê xo yê tradîsyonkîyan mîtîng de cayê xo girewt.

Mîtîngî bi rêzgirewtişî dest pê kerd û warê mîtîngî ra venê 'Marşê Çerxa Şoreşî' bi berz. Verî Nasir Demîrkiranî qisey kerd. Kiranî bale ante polîtîkayanê hukmatî ser û vat çend şino her çî beno vay û kede yena ercankerdene. Şukrane Kablan Yeşîl zî vat: ''Ma ewro ameyî tîya ke zafêr biqîrê. Sabirê ma qedîya. Bêehleqî êyê ke bi serran o welatî ra diznenî. Bêehleqî êyê ke çimê înan werê ma de yo.  Pê ronayîşê zîndananê newayan şarî tersnenê, tehdît kenê. Îqtîdar wazeno bi zextan emrê xo derg bikero. Tecrîd çend şino xorî beno. Garîbe Gezera ke zîndanî ra semedê paştdayîşê qîraye  bi hewayêkê şikdarî dinyaya xo bedilnaye.  Xora zextê vera cinîyan zêdîyenê. Nê welatî de hinî şar nêeşeno hewceyanê xo yê esasîyan bîgiro. Her roje ma zafêr feqîr benê. Ma deynanê xo bi deynan danê. Seba ke bi sloganan îstîfayê hukmatî yeno waştene bi muzîkî kenê nê vengê şarî  bibirnê. Ma veng danê hukmatî wa îstîfa bikero. Ma vera heme zextanê hukmatî tîya de yê û vanê hinî şima ra bes o. Zext û zordarîya şima da çala qirike. Şar kede dano, şima butçe danê operasyonanê teberê welatî. Ma vera polîtîkayanê şerî semedê haştîye tîya de yê. Ma do hewranê sîyayan vila bikerê û ameyoxê roşnî bîyarê.''

Bi eynî waştişî Îstanbul û Îzmîr de zî mîtîngî ameyî kerdene. Qiseykerdişan bale ameye antene krîzê ekonomîkî ser û ame vatene ke wextê îqtîdarê AKPyî de zengînî zafêr zengîn bîyî û karkerd û karkerî çend şino feqîr benê. Qieseykerdoxan vat: ''Dovîz her roje şino dîyar û pîya bi naye her roje her çî vay beno. Semedê bedilnayîşê sîstemî ganî ma têkoşîn pîlêr bikerê. Eke ma bibê yew ma eşkenê ser bikewê.''