Aktîvîstan ard ziwan ke heta ke hemkarîya welatanê Ewropa ya bi Tirkîya dewam bikera Tirkîya zî do tepiştişê Ocalanî rê dewam bikera. Aktîvîstan vat ke sey her merdimî ganî Ocalan zî bieşko heqê xo yê hêvîye bişuxilno û azad bibo.
Vera Komployê Mîyanneteweyî yê serê Rayberê Şarê Kurdî Abdullah Ocalanî asta mîyannetewîye de nêrazîbîyayîşî dewam kenê.
Zanîngehê Oxfordî ra Cigêrayoxe û Antropologe Dr. Amberde Huff, Zanîngehê Tennesse yê Amerîka ra Akademîsyen Prof. Michael Guntero ke 1998 de Şam de Ocalanî reyde pêvînayîş kerdo û nuştoxo skoçyayîj û wayîrê Xelata Nooker James Kelmanî derheqê Komployê 9ê Teşrîna Verêne de ANFyî rê qisey kerd.
Dr. Ambere Huff vat: ''Tepişîyayîşê Ocalanî sîyasî bi û vera têgêrayîşê azadîye yê kurdan gamêke bi. Dewleta tirke vatêne qey eke Ocalan bitepişa hînî eşkena hêvîya merdiman bişikna. Ma ewro vînenê ke fikrê Abdullah Ocalanî rixmê tedaya dewleta tirke zî ciwîyenê. Ganî ma paştî bidê şaranê Kurdîstanî, têkoşînê vera Komployî ra dewam bikerê. Heta ke hemkarîya welatanê Ewropa ya bi Tirkîya dewam bikera Tirkîya zî do tepiştişê Ocalanî rê dewam bikera. Ganî PKK lîsteya terorî ra bêro vetene. No bi xo seba çareserîya meseleya kurdan zaf girîng o.''
Prof. Michael Gunterî vat: ''Eke mabênê Ocalanî û Tirkîya de newe ra dîyalogî bêrê destpêkerdene aramîye do newe ra bêra. Azadîya Ocalanî hem seba şarê kurdî hem zî seba dewleta tirke do biba gamêka pîle. Ganî verî PKK lîsteya terorî ra bêro vetene. Pênasekerdişê kurdan û PKKyî haştîye rê fayde nêkeno. Azadîya Ocalanî do mabênê PKK û Tirkîya de haştîye viraza.''
James Kelmanî vat: ''Kerdişê vera Ocalanî qetî nênê qebulkerdene. Dewleta tirke xo haştîye ra dûrî gêna. Dewleta tirke têna wazena ke Kurdîstanî çin bikera. Ganî heqê hêvî yê Ocalanî bêro dayene. O zî sey her merdimî wa bieşko nê heqê xo bişuxilno. ''
